«38 jastaǵy Audi kóligin tizgindegen júrgizýshi Qosalqy kóshesinde, Amanat kóshesine qaraı baǵyttaǵanda jaıaý júrginshiler jolynda ótip bara jatqan 8 jastaǵy qyzdy qaǵyp ketken. Júrgizýshi qyzdyń ózi turyp ketkenine kóz jetkizgen soń, oqıǵa ornynan izin sýytqan. Dál osy kezde oqıǵa kýágeri qyzdy aýrýhanaǵa aparǵan. Zardap shekken balaǵa medısınalyq kómek kórsetilgen. Qala turǵyny qyzdyń ata-anasyna habarlasqan. JKO saldarynan bala dene jaraqatyn alǵan», dedi Astana PD baspasóz qyzmetiniń basshysy Elmıra Shaýlenova.
Polıseıler júrgizýshini taýyp,tergeý júrgizip jatyr.
Astana polısııa departamenti júrgizýshiler men jaıaý júrginshilerden joldarda óte muqııat bolýdy jáne jol qozǵalysy erejeleriniń talaptaryn qatań saqtaýdy suraıdy. Polıseıler júrgizýshiniń ózi qatysqan JKO ornyn qaldyrýy qoldanystaǵy zańnamaǵa sáıkes jaýaptylyqqa ákep soǵatynyn eskertedi.
Gúlshahra SANSYZBAI
