Otbasynda – 36 bala

Rýstam Shýkýrov pen Mýzzama Mansýrovanyń bas qosyp, shańyraq kótergenine 30 jyldan asypty. Ekeýi de úıelmeli-súıelmeli bala-shaǵasy bar úlken otbasynda ósken. Búginde týǵan uldary Iýldash pen Sherzod erjetip, jeke otaý quryp, úlken azamat boldy. Eki aǵasyna erkelep ósken Shakırasy da boıjetip qaldy, bıyl 16-ǵa toldy.

– Qyzym Shakıra kishkentaı kezinde menimen oınaıtyn eshkim joq, ishim pysty degendi jıi aıtatyn. О́zim alty qursaq kóterdim, úsh nárestem shetinep ketti. Qy­zym­­nyń álgi sózderi kópke deıin kóńil­den ketpeı turyp aldy. Aqy­ry otaǵasy ekeýmiz aqyl­dasa kele, balalar úıinen bala asyrap alýdy uıǵardyq. Áý bas­ta bir-eki bala asyrap alyp, sonymen shektelgimiz kelgen. Biraq balalar úıine kelip, kishkentaı bóbekterdi kórip, tildesip kórgen soń, jeti balany birdeı asyrap al­­dyq. Keıin olarǵa taǵy qo­syl­dy. Allaǵa shúkirshilik, bala­larym­­nyń barlyǵyna táýba deı­min. Esh­qashan janym qınalyp, renjigen emespin, – deıdi Mýzzama.

Kópbalaly otbasy buǵan deıin shaǵyn dúken ustapty. Odan keıin kóterme baǵamen je­mis-jıdek satýǵa kóshti. Jemis-jıdekterdiń kóbi – Shýkýrovtar otbasynyń óz baqshasynda ósken tabıǵı ónim­­der. Sondyqtan bul úıdiń tońazyt­qyshy da únemi túr­li jemis-jı­dekke tolyp tura­dy. Bala­lar­dyń jegeni aldynda, jeme­­geni artynda.

– Balalarymnyń bárin óz balamdaı kórem. Eshqaısysynyń qo­lyn qaqpaı, qanattyǵa qaqtyr­maı, tumsyqtyǵa shoqytpaı mápelep baǵyp-qaǵyp otyrmyz. Shynymdy aıtsam, bizdiń taǵy bala asyrap alǵymyz keledi. Bir ǵana mysal, jaqynda Soltústik Qazaqstan oblysy Saýmalkól balalar úıinen segiz balany asyrap alǵymyz keldi. Arnaıy baryp, óz nıetimizdi bildirdik. Odan keıin de jıi baryp turdyq. Jeme-jemge kelgende, balalar úıiniń basshylyǵy men úı qamqorshylary kedergi keltir­di. Mine, eki jyl ótti. Sol balalar áli balalar úıinde turyp jatyr, – deıdi Rýstam Shýkýrov.

Kópbalaly otbasy kúnine 30 bólke nan satyp alady eken. Erli-zaıyptylardyń aıtýyn­sha, balalardyń kúndelikti as-aýqatyn ázirleý qıyn emes. Mýzzama qyzdaryn as ázirleýge aralastyrmaı, tamaqty ózi daıyndaıdy eken. Úlken bolǵandyqtan, bul úı­degi tamaq ta arnaıy qurylǵylar­dyń kómegimen pisedi. Sondyqtan kópbalaly ana qyzdarym as ázirlep júrip birdemege arandap qalar dep qorqady.

Búginde bul úıdiń úlkeni Katıa taıaýda 18 jasqa toldy. Úsh jasynan bastap balalar úıinde tárbıelengen boıjetkenniń óz otbasyn tapqanyna bir jyl bolypty. Qazir stýdent. Joǵary oqý oryndarynyń birinde óner fakýltetinde bilim alyp jat­qan Katıa bolashaqta teatr ártisi bolǵysy keledi.

– Mundaǵy jaǵdaıymyz balalar úıimen salystyrǵanda, áldeqaıda jaqsy. Ata-anamyz – óte meıirimdi jandar. Qysqy demalysqa keldim. Baýyrlarymdy saǵynyp qalyppyn. Shaǵyn syı­lyqtar tartý etip, bárin qýan­typ qoıdym, – deıdi Katıa.

Qazir Rýstam men Mýzamma tár­bıelegen 8 bala ár qaladaǵy jo­ǵary oqý oryndarynda oqıdy. Úı­diń kenjesi Ázıza – 6 jasta. Kelesi jyly birinshi synypqa barady.

Statıstıka málimetine sensek, elimizde uzyn sany 107 balalar úıi bar eken. Bul mekemelerde 4 606 bala tárbıelenip jatyr. Keıingi bes jyl ishinde 795 otbasy 1 153 bala asyrap alǵan.

Qostanaı oblysy