Tórt ret tize búktirdi

Gagarın kýbogi jolyndaǵy jarystyń pleı-off kezeńine shyǵý úshin jantalasyp jatqan eki ujym da Astanadaǵy básekede jeńis úshin baryn saldy. 8-mınýtta «Barys» sapynan Aleksandr Borısevıch kezdesýdiń esebin ashsa, arada eki mınýt ótkende Nıkıta Mıhaılıs mergendik tanytyp, esepti 2:0-ge jetkizdi. Alaıda birinshi kezeń aıaqtalar tusta san basymdyǵyna ıe bolǵan qonaqtar esep aıyrmasyn qysqartýǵa múmkindik aldy. Robert Hemıltonnyń kók jolaqtyń boıynan baǵyttaǵan shaıbasy qaqpa torynan tabyldy.

Ekinshi kezeńde oıyn biraz saıabyr­sy­ǵandaı boldy. Eki klýbtyń hokkeıshileri alma-kezek shabýyl jasaǵanymen, sońǵy sátte dáldik jetispeı jatty. Kezeń sońyna qaraı qonaq oıynshylarynyń júıkesi syr berip, qatarynan eki hokkeıshisi kishi aıyppen jazalandy. San basymdyǵyna ıe bolǵan jerlesterimiz eki mınýtta eki shaıba soǵyp, esepte alǵa uzap ketti – 4:1. Eki goldy da Aleks Grant óz enshisine jazdy.

Úshinshi kezeńde oıyn tizginin qonaqtar óz qolyna aldy. 44-mınýtta Mıhaıl Kotlıa­revskıı men 59-mınýtta Nıkıta Soshnıkov esep aıyrmasyn qysqartqanymen, tarazy basyn teńestirýge qonaqtardyń shamasy jetpedi – 4:3. Osylaısha, «Barys» «Trak­tordy» osy maýsymda tórtinshi márte jeńdi. Andreı Skabelka shákirtteri keshe Más­keýdiń «Dınamosymen» kezdesti.