«Ákimdik jalpy qýattylyǵy 700 megavatt bolatyn qosalqy stansalardyń qurylysyn jedeldetý qajet. Bıýdjetten qomaqty qarjy bólingen qalany gazdandyrý jumystary da qarqynmen júrip jatyr.
2019 jyly «Saryarqa» gaz qubyrynyń birinshi kezegi aıaqtaldy. Ákimdiktiń mindeti – 300 myńnan astam adam turatyn eldi mekenderge gaz tartý. Qazir tek 8 myń abonent qana gazben qamtamasyz etildi. Gazdandyrýdyń baıaý qarqynyna baılanysty ekologııa nasharlap jatyr - aıazdy kúnderi qalany qalyń tútin basady», dedi Memleket basshysy.
Sondaı-aq ol buǵan deıin elordany gazdandyrýdy aıaqtaýdy birneshe ret tapsyrǵanyn, biraq ony oryndaý merzimderi únemi keıinge shegerilip otyratynyn atap ótti.
«Bul jaǵdaıdy tez arada ózgertý kerek. Úkimet pen ákimdik gazdandyrý jumystaryn kúsheıtip, merziminde aıaqtaýy qajet. Bul rette Úkimet «Samuryq-Qazyna» qorymen birlesip, elordany qajetti kólemdegi gazben qamtamasyz etý máselesin sheshýi qajet.
Sonymen qatar bizdiń azamattar úshin gazdy qosýdyń ózi arzan emes (eki mıllıon teńgege deıin). Al bul jaǵdaı barlyq aımaqtarda qalyptasqan. Básekelestikti qorǵaý jáne damytý agenttigine Úkimetpen birlese otyryp, halyq úshin gazdy qosý baǵasynyń ashyq ári túsinikti bolýyn qamtamasyz etý boıynsha naqty usynystar engizýdi tapsyramyn», dedi Prezıdent.
