Mardymsyz qurylys bastaǵan laýazym ıeleri jemqorlyq boıynsha jaýapqa tartylady

«Biz qalanyń kelbetin saqtap qalýymyz kerek. Astanada álemniń eń úzdik sáýlet úlgileri qoldanylýy kerek. Buǵan deıin qalanyń biryńǵaı dızaın-kody ázirlendi. Biraq bul qujat qaǵaz júzinde ǵana qaldy», dep atap ótti Prezıdent.

Memleket basshynyń aıtýynsha, qazir elordada salynyp jatqan keıbir ǵımarattar bir-birimen múlde úılespeıdi. Qalanyń ońtústik-shyǵys aýdanynda syrtqy sıpaty syn kótermeıtin, beı-bereket salynǵan nysandar kóp.

- «Artem» jáne «Tulpar» saýda ortalyqtarynyń mańyn da retke keltirý kerek. Ákimdik naqty sharalar qabyldaýǵa tıis», - dep qosty el Prezıdenti.

Keńes otyrysy barysynda Qasym-Jomart Toqaev qalanyń kelbetin buzyp turǵan ala-qula jarnamalar kóbeıip ketkenin de sóz etti.

«Jarnamanyń barlyǵy talapqa saı bolýy kerek. Sondaı-aq qalada orynsyz qurylys jumystary kóbeıip ketti, ıaǵnı úılerdiń arasyna ǵımarat salyna beretin boldy. Bul ásirese, «Myńjyldyq» alleıasynda, Saraıshyq, Syǵanaq, Turan, Beısekov kóshelerinde qatty baıqalady. Turǵyndarǵa áleýmettik nysan, saıabaq nemese oıyn alańy salynady dep ýáde beriledi. Alaıda, ol jerde ıin tiresken ǵımarattar paıda bolady. Mysaly, «Olımp palas-2» turǵyn-úıiniń aýlasyndaǵy oıyn alańynyń ornyna záýlim keńse salynǵan. Mundaı qurylysty birjola doǵarý kerek. Áıtpese, sheshim qabyldaǵan tıisti laýazym ıeleri jemqorlyqqa baılanysty jaýapqa tartylady. Sebebi osyndaı sheshimderdiń astarynda qurylys kompanııalarynyń ákimdikte jumys isteıtin adamdarmen birge azamattarymyzdyń yqylasyna qarsy qabyldaǵan áreketteri jatyr», dep túıindedi Qasym-Jomart Kemeluly.