Elordalyq fılarmonııa kórermenderge 100-den astam konsert usynady

Elordada ótken onlaın-brıfıng barysynda fılarmonııanyń bas dırektory Erlan Dákenov mádenıet mekemesiniń qyzmeti men aldaǵy josparlary týraly aıtyp berdi. Onyń aıtýynsha, bıyl kórermenderdi jańa jobalar men konserttik baǵdarlamalar kútip otyr.

«Qańtar aıynda vokal bólimi Erkeǵalı Rahmadıevke arnalǵan «Tań samaly» konsertin usynǵan edi. Qazaq orkestri óziniń kúntizbelik jylyn «Kúı atasy – Qurmanǵazy» konsertimen ashady. Fılarmonııa solısterin Muqaǵalı Maqataevtyń shyǵarmashylyǵy erekshe áserlendirip, «Esińe meni alǵaısyń...» jobasyna sebepshi boldy. Halyq ánshileri Aqan seriniń 180 jyldyǵyna oraı «Dala dástúri» keshin daıyndap otyr, al sımfonııalyq orkestr jyl boıy Muqan Tólebaevtyń 110 jyldyǵyna arnalǵan is-sharalar ótkizedi. Sol sııaqty zamanaýı horeografııa baleti ALEM – «SOLO» dıvertısmentiniń plastıkalyq qoıylymynda jarqyn premera kútilip otyr. Kameralyq hor túrli baǵdarlamalardy, onyń ishinde Germanııadan kelgen balalar horyn josparlap otyr. Úrmeli aspaptar orkestri óziniń premeralarymen qýantady jáne bıyl Dante Alıgerı, «Sý elementteriniń mýzykasy», «Tik-Tok» boıynsha konsertter usynady», dedi Erlan Dákenov.

Bıyl fılarmonııanyń shyǵarmashylyq ujymdary gastrolderge de shyǵady. Máselen, Naýryz merekesi kúnderi qazaq orkestri Túrkııada óner kórsetedi, al «Saryarqa» halyq mýzykasy ansambli men «Shalqyma» halyq bı ansambli Lıýksembýrgke attanady. Ǵ.Jubanova atyndaǵy Memlekettik ishekti kvartet «La cle des portes» fransýz festıvaline qatysady.

Qazaqstan boıynsha da gastroldik saparlar josparlanyp otyr. Buqar jyraýdyń 330 jyldyǵyna arnalǵan «Dala dástúri» baǵdarlamasymen halyq ánshileri Qaraǵandy, Qarqaraly, Jańaarqa, Jezqazǵan qalalaryna barady. Al úrmeli orkestr Petropavl, Qaraǵandy, Aqtóbe, Atyraý, Aqtaý jáne basqa da qalalarǵa barady.

Konserttik mekemeniń ujymdary elordanyń 25 jyldyǵyna oraı kóptegen ashyq festıvalder men is-sharalar josparlap otyr.

Aıta ketsek, dombyra kúnine oraı Qurmanǵazynyń 200 jyldyǵyna arnalǵan fılarmonııalar sherýi ótedi, elorda kúnine arnalǵan orasan zor mýzykalyq festıval daıyndalyp jatyr, oǵan fılarmonııanyń barlyq ujymy men arnaıy shaqyrylǵan juldyzdar qatysady. Bıylǵy baǵdarlamada – «Astana daýysy» festıvali, Manarbek Erjanov atyndaǵy respýblıkalyq baıqaý, alǵash ret ashylǵan «Zamanaýı bı festıvali» respýblıkalyq televızııalyq jobasy jáne basqalary da bar.

Aıta ketsek, ótken jyly fılarmonııa 350-ge jýyq is-shara ótkizdi, oǵan 400 myńǵa jýyq adam qatysqan. Mekeme ujymdary 13 gastroldik týrǵa qatysty.