Shymkentte tóbeles uıymdastyrmaq bolǵandar ustaldy

Qalalyq prokýratýranyń qatysýymen jedel-izdestirý is-sharalaryn júrgizý barysynda Shymkent qalasy PD uıymdasqan qylmysqa qarsy kúres basqarmasynyń qyzmetkerleri  qala aýmaǵyndaǵy birneshe mekenjaıda kúdiktilerdi ustaý jumystaryn júrgizdi. 

Nátıjesinde polısııaǵa 25-38 jas aralyǵyndaǵy 10 adam jetkizildi. Olardyń úsheýi sot sheshimimen qamaldy, ekeýi úıqamaqqa alyndy. Qalǵandarynyń róli sotqa deıingi tergeý barysynda anyqtalady. Olardan zattaı dáleldemeler retinde Makarov jáne TT tapanshalary, 4 travmatıkalyq tapansha, AK-103 avtomaty, 12 kalıbrli MS 21-12 ózdiginen oqtalatyn myltyǵy  jáne 410 kalıbrli  ózdiginen oqtalatyn Saıga-410 karabıni, 16 kalıbrli qos aýyzdy tegis uńǵyly TOZ myltyǵy, sondaı-aq ártúrli kalıbrli 93 oq-dári tárkilendi.

Tergeýshiler sotqa deıingi tergep-tekserý barysynda osy jyldyń qańtar aıynyń basynda bir top adam  jergilikti turǵyndy urlap, qala syrtyna alyp ketkenin anyqtady. Olar ony uryp-soǵyp, pnevmatıkalyq qarýmen jaralaǵan. Er adam zańdy túrde polısııaǵa júginýdiń ornyna, qylmyskerlerden kek alý maqsatynda óziniń tanystaryn qarýlandyryp, qarý-jaraq ala bastaǵan. Biraq polısııanyń kásibı jáne jedel áreketiniń arqasynda adam shyǵynyna ákep soǵýy múmkin qarýly qaqtyǵysty toqtatý múmkin boldy.

Qazirgi ýaqytta atalǵan derekke qatysty Shymkent qalasy PD-nyń tergeý basqarmasy QR QK-niń 287-baby 4-bóligi  (Adamdar tobynyń atys qarýy men oq-dárilerdi zańsyz satyp alýy, saqtaýy, alyp júrýi nemese tasymaldaýy) boıynsha sotqa deıingi tergeý amaldaryn júrgizip jatyr.