Oblystyq Tótenshe jaǵdaı departamenti bastyǵynyń mindetin atqarýshy Azamat Orynbaevtyń aıtýynsha, kóp keshikpeı kún jylyp, qar kóbesi sógile bastasa, óńirdegi 37 eldi mekende 808 úıdi sý basyp qalýy múmkin.
Ásirese, Arqalyq qalasy men Áýlıekól, Naýyrzym, Amankeldi, Jankeldın, Qarasý aýdandaryna qarasty eldi mekenderge tasqyn sýdan tóngen qaýiptiń aldyn alýǵa qazirden bastap qamdanbasa bolmaıdy. Alaıda aýdan ákimderi men qutqarýshylardyń boljamy sáıkes kelmeı otyr. Máselen, TJD-nyń málimeti boıynsha, 2021 jyly Tobyl qalasynyń Lesnaıa kóshesindegi 25 úıdiń aýlasyna deıin qar sýy basyp qalǵan. Biraq Qostanaı aýdanynyń ákimi Jansultan Táýkenov bul úılerdi sý basqan joq dep otyr. Ákim bıyl bul kósheler kóktemde arnaıy motosorǵylarmen qurǵatylatynyn aıtty.
Al kóktemde saı-saladan keletin qyzyl sýdy qarsy alýǵa qam jasap jatqan Fedorov aýdany eldi mekenderdiń mańaıyndaǵy sý ótkizgish qubyrlardy aýystyratyn qarjy surap otyr. Aýdan basshylary 749 mln teńgege joba ázirlep qoıypty, biraq TJD ókilderi Fedorov aýdanyna bıyl tasqynnan keler tikeleı qaýip joq ekenin alǵa tartady.
О́ńirde barlyǵy 98 gıdrotehnıkalyq nysan bar. Onyń 12-si tozyp tur. Ábden tozyp bitýge shaq turǵan 7 bóget sýdyń ekpinine shydas bermeýi múmkin. Naýyrzym aýdanynyń Býrevestnık aýyly, sondaı-aq Qarasý aýdanynyń birqatar eldi mekeninde de kóktemgi sý tasqynynan muqııat daıyndalmasa bolmaıdy.
Qarasý aýdanynyń ákimi Vıktor Radchenkonyń aıtýynsha, aýdandaǵy 13 bógettiń tórteýi jóndeýdi qajet etedi. Bul bógetterdiń sý tasqynyna bálendeı áseri joq. Degenmen aýdandaǵy sý tasqynyna tosqaýyl bolatyn nysandardy jóndeý máselesin búginnen bastap sheshý qajet.
Al Jankeldın aýdanynyń ákimi Shota Ospanov keıingi 15 jylda sý tasqyny kezinde eldi mekenderdi sý basý oqıǵasy tirkelmegenin aıtty. Soǵan qaramastan qazirgi tańda sý tasqyny kezinde qaýip tónýi múmkin eldi mekenderdegi turǵyndardyń tizimi ázirlengen.
– Sý tasqyny qateriniń aldyn alý maqsatynda jyl saıyn Qonyraýly ózeninde muzdardyń keptelisin joıý úshin eki jerden muz jarý jumysy júrgiziledi. Sonymen qatar Qabyrǵa ózeniniń boıynda Kúıgenkón qonys ornynda arnaıy gıdrobeket ornalasqan. Iаǵnı sý tasqyny kezinde sýdyń jyldamdyǵy men sý arnasynyń kóterilý deńgeıi boıynsha monıtorıng jasalady. Tótenshe jaǵdaı qyzmetkerleri aýyldyq okrýg ákimderimen birlesip sý tasqyny kezinde zardap shegýi yqtımal eldi mekenderdi, sharýa qojalyqtary ornalasqan qonys oryndaryndaǵy úıler men adamdardyń sanyn tizimdep, ýaqytsha qaýipsiz aýmaqqa kóshirý oryndaryn belgilep qoıdy, – dedi Sh.Ospanov.
Qostanaı oblysy
Elordada Naýryz kóje daıyndaýdyń rekordtyq mejesi qoıyldy
Elorda • Keshe
Elimizde «Jer saǵaty» aksııasy ótedi
Qoǵam • Keshe
Bıylǵy Oraza kestesi jarııalandy
Din • Keshe
Almaty oblysynda Naýryz merekesi keń kólemde atap ótildi
Aımaqtar • Keshe
Uqsas jańalyqtar
