Energetıka, Indýstrııa jáne ınfraqurylymdyq damý mınıstrlikteriniń, «TKSh QazOrtalyǵy» AQ, Atom jáne energetıkalyq qadaǵalaý jáne baqylaý komıtetiniń ókilderi Ekibastuzǵa bardy. Jóndeý jumystarynyń barysymen tanysqannan keıin jumys tobynyń músheleri áleýmettik nysandar men kóppáterli turǵyn úılerdi aralady.
«Búgingi tańda Ekibastuz JEO-da bes qazandyq – eki energetıkalyq jáne úsh sý jylytý qazandyǵy jumys istep tur. Taǵy 5 qazandyqta jóndeý jumystary júrgizilip jatyr. Sonymen qatar jylý jelisiniń zaqymdanýyn joıý boıynsha táýlik boıy jumys júrgizilip jatyr. Qazirgi ýaqytta jóndeýmen qamtylǵan oramishilik ýchaskelerde toǵyz zaqym bar», dep jazady Úkimettiń baspasóz qyzmeti.
Sonymen qatar Ekibastuzda jylý berý temperatýrasyn retteý jumystary jalǵasyp jatyr. Normatıvke sáıkes, ol 77/53oS (shyǵý kezinde), qazirgi kezdegi naqty kórsetkish – 64/45oS (shyǵý kezinde) bolýy kerek.
«6 aqpanda jylýdyń temperatýralyq parametrleriniń tómendeýine baılanysty mektep oqýshylaryn qashyqtan oqytý formatyna kóshirý týraly sheshim qabyldandy. Jumys aıaqtalǵannan keıin oqytý formaty shtattyq rejımde qalpyna keltiriledi», delingen habarlamada.
Qalada júıeli túrde jylynbaıtyn 28 kóppáterli turǵyn úı bar. Osyǵan baılanysty jylytý maýsymy kezeńinde osy úılerdi jylýmen jabdyqtaý júıelerin neǵurlym joǵary parametrler boıynsha baptaý týraly sheshim qabyldandy. Barlyq jumystardy tıisti kommýnaldyq kásiporyndar júrgizedi.
«Sondaı-aq qalada jylytý maýsymy aıaqtalǵannan keıin bastalatyn aýqymdy jóndeý naýqanyna daıyndyq júrgizile bastady. Búgingi tańda qalalyq jylýmen jabdyqtaý júıesine tehnıkalyq aýdıt júrgizilip jatyr. Bul rette memlekettik saraptamadan ótetin jalpy uzyndyǵy shamamen 5 km bolatyn tórt magıstraldy rekonstrýksııalaý josparda bar», dep jazady baspasóz qyzmeti.
