Astanada jeńil atletıkadan Azııa chempıonaty ótip jatyr

Úkimet basshysy sharany asha otyryp, Prezıdent Qasym-Jomart Toqaevtyń quttyqtaý hatyn oqydy.

«Sport shekara talǵamaıdy, memleketter men halyqtardyń dostyǵyn nyǵaıtyp, jaqyndastyra túsedi. Qazaqstan sport salasyna aıryqsha mán beredi. Elimizde azamattardyń kásibı jáne buqaralyq sportpen aınalysýy úshin barlyq jaǵdaı jasalǵan. Bul salanyń ınfraqurylymyn damytýǵa kóp kóńil bólinedi. 6 myńnan astam adam sııatyn Jeńil atletıka kesheni – osynyń aıqyn dáleli. Qazaqstan sportshylary kóptegen dúbirli dodada top jaryp, el abyroıyn asqaqtatyp júr. Olar óskeleń urpaqqa úlgi-ónege bolyp, jastardy jarqyn jeńisterge bastaıdy. Azııa birinshiliginiń Astana tórinde ótýi elimizde jeńil atletıkany damytýǵa tyń serpin beredi dep senemin. Biz osy saladaǵy halyqaralyq uıymdarmen yntymaqtastyqty nyǵaıta túsemiz. Barshańyzǵa zor densaýlyq, tolaǵaı tabys tileımin!», delingen Memleket basshysynyń quttyqtaý hatynda.

О́z kezeginde Álıhan Smaıylov barlyq sportshyǵa sátti óner kórsetýdi, al Qazaqstan ulttyq quramasyna jeńis tuǵyryna kóterilýdi tiledi.

QR Premer-mınıstri Azııa jeńil atletıka qaýymdastyǵynyń prezıdenti Dahlan Ál-Hamadqa jarysty uıymdastyrýǵa jáne ótkizýge qoldaý kórsetkeni úshin erekshe alǵysyn bildirdi.

Jabyq alań ishindegi jeńil atletıkadan Azııa chempıonaty TMD elderiniń aýmaǵynda alǵash ret ótkizilip otyr. Oǵan 31 elden 500-den astam sportshy qatysady. Sportshylar arasynda júgirý, estafetalyq júgirý, uzyndyqqa sekirý, bıikke sekirý, úsh ret sekirý, syryqpen sekirý, ıadro laqtyrý jáne kópsaıys sııaqty jarys túrleri boıynsha 26 medal jıyntyǵy sarapqa salynady. Qazaqstan ulttyq quramasynda 69 sportshy bar.

Halyqaralyq jarystar Astana qalasynda 10-12 aqpan aralyǵynda ótedi.