Qasym-Jomart Toqaev úı mańyndaǵy aýmaqtyń jaǵdaımen tanysyp, jergilikti turǵyndarmen áńgimelesti. Qala aýlalarynda balalarǵa arnalǵan oıyn jáne sport alańdary salynyp, trenajerler ornatylǵan, trotýarlar jasalǵan, kólik turaǵy oryndarynyń sany kóbeıip, joldar asfalttalǵan.
«Halyq qatysatyn bıýdjet» jobasy aıasynda Stepnogorsk qalasynyń ákimdigi úshinshi jyl qatarynan abattandyrý jumystaryn júzege asyryp keledi. Iske asyrylatyn jobalardy turǵyndardyń ózderi daýys berý arqyly tańdaıdy.
2023 jyly Aqmola oblysynda aýlalardy jóndeýge óńirlik bıýdjetten 900 mıllıon teńge bólindi, onyń jartysy Stepnogorsk qalasyna baǵyttalǵan.
Qala turǵyndarymen áńgimelesý barysynda Prezıdent Stepnogorsk qalasynyń damýyna erekshe kóńil bóletinin atap ótti. Jergilikti JEO men jylý jelileriniń jaǵdaıy – Stepnogorsk turǵyndaryn alańdatatyn mańyzdy máselelerdiń biri. 
«Osy kásiporyndaǵy jaǵdaımen tanysqannan keıin bul máselelerdi muqııat saralaýǵa sheshim qabyldadym. Úkimetke ákimdikpen jáne kásiporyn ıelerimen birlese otyryp, is-áreket algorıtmin ázirleýge, sheshimder qabyldaýǵa tapsyrma berdim», dedi Memleket basshysy.
Qala turǵyndary ekologııa máselesin de kóterdi. Atap aıtqanda, Qasym-Jomart Toqaev Stepnogorsk qalasynda PHD qaldyqtaryn saqtaýǵa baılanysty jergilikti turǵyndardyń alańdaýshylyǵyna qatysty óz pikirin aıtty.
«Men bul máseleden habardarmyn. Maǵan ýtılızasııa boıynsha shaǵyn kásiporyn salý jóninde sheshim bar ekenin baıandady. Mundaı sheshimdi qoldaımyn», dedi Prezıdent.
«Bestóbe» kenishine qatysty jaǵdaı da nazardan tys qalmady. Bul másele Prezıdenttiń baqylaýynda, jergilikti organdarǵa atalǵan problemany sheshý jóninde tıisti tapsyrma berildi.
Kezdesý sońynda Qasym-Jomart Toqaev qala turǵyndaryna zor densaýlyq, tabys, baq-bereke tiledi. 
