Búgin elordanyń Kongress ortalyǵynda Tartyl Fest respýblıkalyq týrnıri grand-fınalynyń jeńimpazdaryn marapattaý rásimi ótti.
9 sanat boıynsha synǵa túsken sportshylardyń ishinde eń úzdik óner kórsetken Mansur Ýalıev, Egor Nogın, Ilııas Mukyshev, Aıbat Qapanov, Rýslan Fatahov, Evgenıı Sozonchýk, Rýslan Kasmanov, Evgenıı Nam jáne Vıtalıı Bıbıkov 3 mln teńge kóleminde syıaqy aldy.
Ekinshi oryndy Aıdos Súıindik, Nurhat Tileýlıev, Radmır Temirbolat, Nıkıta Oleınık, Islam Berehanov, Ramıl Ábishev, Andreı Antonıans, Ilıa Ivanov jáne Valentın Jýkov ıelendi. Olar 2 mln teńgeden aldy.
Úshinshi oryn men 1 mln teńgelik syıaqyǵa Danıl Eshenko, Aslan Baýbekov, Naıl Imınov, Erhan Maıorov, Almas Sapar, Tımýr Andreev, Damır Nábıev, Oleg Gýrskıı jáne Arman Jamalıev ıe boldy.
80 kelige deıingi salmaq dárejesinde baq synaǵan Evgenıı Nam 52 ret tartylyp, rekord ornatqan.
«Maqsatym óz rekordymdy jańartý edi. Bul grand-fınalǵa uzaq daıyndaldym. Árıne, ár sportshy óz rekordyn jańartý úshin ter tógedi. Meniń búgingi maqsatym sol boldy, ıaǵnı óz-ózimmen jarystym», deıdi atlet.
Marapattaý rásiminde Mádenıet jáne sport mınıstri Ashat Oralov atalmysh týrnır jyl saıyn ótkiziletinin atap ótti.
«Buqaralyq sport túrlerin damytý – bizdiń negizgi maqsatymyz, mindetimiz. Memleket basyshsy Qasym-Jomart Toqaevtyń tikeleı qoldaýymen elimizde tuńǵysh ret, elordanyń tórinde Tartyl Fest atty sport merekesi ótti. Mádenıet jáne sport mınıstrligi uıymdastyrýshy komıtetpen birlesip bul jobany mindetti túrde jyl saıyn ótkizip, dástúrge aınaldyrady degen usynys bildirgim kelip otyr. Bolashaqta bul jobany qoldaı otyryp, buqaralyq sport túrine myńdaǵan jasópirim keledi dep senemiz», dedi mınıstr Tartyl Fest qorytyndysyn shyǵaryp.
