«Arystanmyn, aıbatyma kim shydar?» degen óleńinde Maǵjan ólim týraly «Men ólmeımin, meniki de ólmeıdi...» dep aıtqan ǵoı. «Men» men «meniki» týraly uly Abaı «Kók tuman – aldyndaǵy keler zaman» óleńinde:
«Aqyl men jan men ózim, tán meniki,
«Meni» men «menikiniń» maǵynasy eki.
«Men» ólmekke taǵdyr joq áýel bastan,
«Meniki» ólse ólsin, oǵan beki»,
dese Maǵjan «menikiniń» de ólmeıtinin aıtqan eken. Shynynda Abaı, Maǵjan sııaqty aqyndardyń týǵan halqy barda «menikisi» óler me? Ǵajap sózderi, ǵasyrlarǵa jetetin danalyǵy umytylar ma? Kerisinshe olar jańa oımen, jańa sezimmen, jańa tanymmen jańǵyryp, jetile bermeı me? Osy sózdiń rastyǵyn keshe Maǵjannyń 130 jyldyǵyna arnalǵan Qyzyljardaǵy respýblıkalyq jazba aqyndar músháırasy dáleldep berdi. «Men ólmeımin, meniki de ólmeıdi» atty bul músháıraǵa elimizdiń túkpir-túkpirinen 20 men 50 jas aralyǵyndaǵy 90 adam qatysty. Olardyń ishinen 9-y iriktelip, Maǵjan Jumabaev atyndaǵy tuńǵysh ádebı syılyqtyń laýreattary atanyp, 300 myń teńgeden syılyq aldy. Maǵjan únin búginge jalǵastyrýshylar qatarynda Astana qalasynan Tanakóz Tolqynqyzy, Baýyrjan Qaraǵyzuly, Almaty qalasynan Baǵdat Múbárak, Abaı oblysynan Mereı Qart, Aqmola oblysynan Qýanysh Ospanov, Qostanaı oblysynan Abylaı Maýdanov, Shymkentten Araılym Muratálıeva, Qyzyljar óńirinen Amanjol Zaǵypar men Nurgúl Oqasheva jeńimpaz dep tanyldy. 90 adamnyń arasynan 9 aqyndy tańdap alý Qazaqstan Jazýshylar odaǵynyń Ulyqbek Esdáýlet, osy uıymnyń Arqadaǵy alty oblysynyń kýratory Dáýletkereı Kápuly jáne ádilqazylar alqasynyń úshinshi múshesi bolǵan osy joldardyń avtoryna ońaı bolǵan joq.
«Ot bolyp týǵan jasyn ediń ǵoı!
О́mirge sheksiz ǵashyq ediń ǵoı!
Adamzat túgil zammannan ozǵan
О́shpeıtin altyn ǵasyr ediń ǵoı.
Ar menen uıat – qazyǵyń boldy!
Mahabbat – jalǵyz azyǵyń boldy.
Qazaqty súıdiń, aıybyń – osy!
Sol seniń jalǵyz jazyǵyń boldy!»
(Tanakóz Tolqynqyzy)
degen sııaqty sony pikirli joldardy árbir aqynnyń óleńderinen tabýǵa bolatyn.
Is-shara aıasynda júldeli bolǵan aqyndarmen M.Qozybaev atyndaǵy SQÝ-da, M.Jumabaev atyndaǵy gýmanıtarlyq kolledjde, Abaı atyndaǵy mamandandyrylǵan qazaq mektep-gımnazııasynda jáne Nazarbaev zııatkerlik mektebinde shyǵarmashylyq kezdesýler uıymdastyryldy.
Petropavl
