Jaqynda elordadaǵy B.Maılın atyndaǵy №52 mektep-gımnazııasynda Alash qaıratkeri Maǵjan Jumabaıulynyń 130 jyldyǵyna oraı qalalyq semınar ótti. Professor Nursha Orazahynovanyń «Satylaı keshendi oqytý» tehnologııasy boıynsha uıymdastyrylǵan is-sharada bastaýysh synyp oqýshylary birneshe pán boıynsha bilim deńgeılerin kórsetti. Joǵarydaǵy suraqtarǵa da osy semınar kezinde jaýap aldyq.
«Satylaı keshendi oqytý» – Alash zııalylarynyń bilim berý salasyndaǵy muralary negizinde jasalǵan tehnologııa. Otbasy men mektep arasyndaǵy bilim berýdi jáne ulttyq tárbıeni ushtastyrǵan tehnologııa sheńberinde mekteptiń 1-4 synyptary «Qazaq tili» men «Qazaq ádebıeti», 5-6 synyptar «Qazaq tili», «Qazaq ádebıeti», «Orys tili», «Aǵylshyn tili», «Qazaqstan tarıhy», «Matematıka» pánderinen bilik daǵdylaryn damytyp keledi. Osy tehnologııa arqyly oqý ordasynda «úshtik odaq» jumysy da júıeli jolǵa qoıylǵan.
Semınar kezinde 1-synyp oqýshylary aqyn esimindegi dybystarǵa dybystyq minezdeme berse, 2-synyp oqýshylary Maǵjannyń «Besik jyryn» mánerlep oqyp, óleń sózderindegi dybystarǵa matematıkalyq tásilmen minezdeme jasady. Al 3-synyp oqýshylary J.Aımaýytulynyń «Maǵjan – aldymen syrshyl aqyn» degen sózindegi «syrshyl» sózin sózsazyndyq satylaı keshendi taldaý tehnologııasymen taldap berdi. Bastaýysh synypty aıaqtaǵaly otyrǵan 4-synyp oqýshylary aqynnyń «Men jastarǵa senemin» óleńin jatqa oqyp, óleń joldaryndaǵy «ar-uıat» sózin sóz quramyna, leksıka-grammatıkalyq maǵynasyna qaraı satylaı keshendi taldady.
Bıylǵy oqý jylynda orta býynǵa qadam basyp, bastaýysh synyptardan bastap «Satylaı keshendi oqytý» tehnologııasymen bilim alyp, qalalyq, respýblıkalyq, halyqaralyq jarystarda erekshe bilimimen kózge túsip júrgen 5-synyp oqýshylary Maǵjan Jumabaıulynyń «Týǵan jer» óleńine taldaý jasady. Bir aıta keterligi, bul oqýshylar taldaýdy qazaq, orys jáne aǵylshyn tilderinde jasap, aqyn týyndysyna matematıkalyq esep te júrgizdi. Úsh tildi erkin meńgergen oqýshylar Alash arysynyń murasyn tól tehnologııa arqyly osylaısha boılaryna sińirip keledi.
– Oqý-aǵartý isinde eleýli eńbek etken Maǵjan Jumabaıuly bir ǵana «Saýatty bol!» oqýlyǵy arqyly talaı urpaqtyń kókirek kózin ashty. Tórt jyldyq bastaýysh mektep mindetterin jiktep bergen aqyn balanyń bir nársege umtylýy onyń aqyly, sezimi, jany, denesi, qaıratynyń birdeı kúsh jumsaýy arqyly bolatynyn aıtady. Maǵjan bala shaqta alynǵan áserdiń ómir boıy esten shyqpaýynyń mánisin ǵylymı turǵyda da ashyp bergen. «Jas bala – jas bir shybyq, jas kúnde qaı túrde ıip tastasań, eseıgende sol ıilgen kúıinde qaıtyp almaq», deıdi aqyn. Sol sebepti bastaýyshta berilgen bilim – adamnyń ómir boıy jınaıtyn bilim-biliginiń negizi bolyp qala bermek. Alash arystary bilimniń negizi bastaýyshta qalanatynyn jaqsy bilgen. Al tól tehnologııanyń ózegi – ýaqyt talabyna saı oqý-tárbıe úrdisin ulttyq qundylyqtarǵa negizdeý. Osy tehnologııa boıynsha oqıtyn bala ana tilin ǵana jetik meńgerip qoımaı, sózdik qoryn baıytyp, ózge pánder boıynsha da oılaý qabiletin damyta alady, – deıdi professor Nursha Orazahynova.
Y.Altynsarın atyndaǵy Ulttyq bilim akademııasy Orta bilim berý mazmuny ınstıtýtynyń «Qazaq tili», «Qazaq ádebıeti» zerthanasynyń meńgerýshisi Aıman Aqtanova bastaýysh synyp oqýshylarynyń taldaýlaryn, saýatty sóz saptaýlary men oı júıriktigin joǵary baǵalady. «Jas urpaqtyń boıyna ulttyq qundylyqtardy sińirýge erekshe qyzmet etip, mol mura qaldyrǵan Maǵjan Jumabaıulynyń eńbekterin «Satylaı keshendi oqytý» tehnologııasy arqyly bala boıyna sińirýdiń ereksheligi mol», dedi ol.
Oqýshylardyń bilim deńgeıin Orta bilim berý mazmuny ınstıtýtynyń ǵylymı qyzmetkerleri – Gúldarıǵa Kenjebaeva, Janbota Esepbaı, Qaıyrken Adıet, Aınur Arhymataeva jáne «Astana daryny» daryndy balalar men talantty jastardy anyqtaý jáne qoldaý ortalyǵynyń bólim meńgerýshisi Sara Bektasova baǵalaǵanyn atap óteıik.
