Aımaqqa 400 mlrd teńgeden astam qarjy tartylǵan. Qyzylorda oblysynda qala, aýdan, aýyl ákimderiniń jumysy óz ólkesine ınvestısııa tartý kórsetkishimen erekshelenedi.
Úzdik nátıje kórsetken aýdannyń biri – Qazaly. Munda ınvestısııanyń basym bóligi aýyldardy damytýǵa arnalǵan. Máselen, ótken jyly 18 mıllıard teńge ınvestısııa tartylǵan Qazaly aýdanynda qurylys qarqyn alyp, 25 iri óndiristik-saýda ortalyǵy salyndy. Sonymen qatar demeýshiler kómegimen ondaǵan áleýmettik nysan boı kóterdi. Úrmash Túktibaev aýyly turǵyndarynyń suranysymen salynyp jatqan sport kesheninde ashylatyn úıirmelerge jastar osy bastan tirkelip jatyr. Sonymen qatar eldi meken sharýalarynyń ótinishi boıynsha egistikti sýaratyn 12 shaqyrymdyq arna tazalandy.
«Halyq usynystarynyń biri ınternet júıesi bolsa ol óz kezeginde oryndaldy. Eldi meken ortalyǵyna joǵary jyldamdyqty ınternet qurylyp, paıdalanýǵa berildi. Bıyl aýylishilik 6 kóshege ortasha jóndeý jumystaryn júrgizýge oblystyq bıýdjetten qarjy qaralyp, qazirgi ýaqytta memlekettik satyp alý jumystary júrgizilip jatyr», dedi Alǵa aýyldyq okrýginiń ákimi Oljas Ahmetov.
2023 jyly aýdanǵa 20 mlrd teńge ınvestısııa tartý josparlanyp otyr. Qarjy negizinen aýyl joldaryn jańǵyrtyp, shalǵaı eldi mekenderde jeke balabaqsha jelisin qalyptastyrýǵa baǵyttalady.
