Áleýmettik jeli qoldanýshylary 16 aqpanda Ashybulaq aýyldyq okrýgindegi «Almagúl» saıajaıynda bolǵan oqıǵany qyzý talqyǵa salǵan edi. Sol kúni káriz jelisiniń jarylǵanyn túsirýge kelgen telearna jýrnalısteri men aýyl turǵyndary ákimge birqatar suraq qoıǵan. «Siz halyqpen birge bolýyńyz kerek, sizdi halyq saılady» degen kisige ákim «Qatelesesiz, meni depýtattar saılady. Kelesi joly men saılaýǵa qatyssam, halyq tańdaıdy» dep jaýap bergen.
«Okrýg ákimi Jasulan Ońalbaevtyń «meni halyq emes, depýtattar saılady» degen sózi qate boldy. Bul oqıǵa qoǵamnyń ashý-yzasyn týdyrdy. Departamenttiń usynysy negizinde Ashybulaq aýyldyq okrýginiń ákimi memlekettik qyzmetshilerdiń Ádep kodeksin buzǵany úshin tártiptik jaýapkershilikke tartyldy. Oǵan sógis berildi», dep habarlady Almaty oblysy memlekettik qyzmet isteri agenttiginiń departamenti.
Keıin oblys ákimdigi Jasulan Ońalbaevty bul qyzmetke shynymen de jergilikti aýdandyq máslıhat depýtattary saılaǵanyn habarlaǵan.
