Atalmysh jarys Astana qalasynda 2022 jyly jańadan ashylǵan «Arǵymaq» at-saýyqtyrý sport kesheniniń júldesi úshin uıymdastyryldy.
Is-sharanyń ashylý saltanatyna Astana qalasynyń Ulttyq jáne olımpıadalyq at sporty túrleri federasııasynyń prezıdenti Erlan Kanalımov, Astana qalasy ákiminiń orynbasary Eset Baıken jáne Olımpıadalyq at sporty túrleri boıynsha memlekettik jattyqtyrýshy Amanjol Hasenov qatysyp, shabandozdarǵa sáttilik tiledi.
Jarysqa elimizdiń Astana, Almaty, Shymkent jáne Qaraǵandy qalalarynan 50-ge jýyq shabandoz qatysty. Olar bıiktigi men kúrdeliligi boıynsha bes túrli baǵytta baq synady.
«Bul keshende aldaǵy ýaqytta erekshe qajettiligi bar balalarǵa arnalǵan jańa ıppoterapııa ortalyǵy qoldanysqa beriledi. Mundaǵy basty maqsat – ıppoterapııa arqyly erekshe kútimdi qajet etetin balalardyń psıhofızıologııalyq belsendiligin damytý. Qalamyzda múmkindigi shekteýli jandardy qoldaý boıynsha birqatar úlken aýqymdy jumys júrip jatyr. Elordada 2 myńnan astam múmkindigi shekteýli jandar bar. Osy jańadan ashylǵaly jatqan ıppoterapııa ortalyǵy búldirshinderdiń shıpasyna kómektesse, ata-analarǵa úmit syılasa, oń áserin tıgizse, odan asqan qýanysh joq shyǵar dep oılaımyn», dedi Erlan Kanalımov.
Jarystyń qorytyndysy boıynsha balalar sanatynda Almatylyq shabandoz Ámına Akshına Gordyı atymen birinshi oryndy enshiledi. Al elordalyq Jandos Jaqyp Kamelot tulparymen kúmis júldeger atandy. Úzdik úshtikti Qaraǵandy qalasynan Kaprıol tulparymen qatysqan Kámıla Dýrjýbaeva túıindedi.
Dónender jarysynda 100 sm-ge deıingi kedergilerdi «Kaılo Ren» sáıgúligimen múltiksiz oryndaǵan Maksım Papıhınge altyn júlde buıyrdy.
Ekinshi, úshinshi oryndardy Nurbolat Qartqojaq Búrkit atymen jáne Tornado atymen shyqqan Vıktorııa Kotına enshiledi.
Bıiktigi 120 sm-ge deıin synda besti attar sanatynda «Salvador» sáıgúligimen qatysqan Malıkadjar Chıngız altynnan alqa taqty. Rafııa esimdi tulparymen Murat Mansýr kúmis júldeger atansa, Nurbolat Kartkojak «Rabat» esimdi tulparymen qola medalǵa ıe boldy.
Kedergilerdiń bıiktigi 125 sm-ge deıin bolatyn tórtinshi sanatta (6 jastan joǵary) úzdik úshtikti Spektr Saıgon tulparymen Vıktorııa Kotına enshiledi. Kúmis júlde Marıgold sáıgúligimen óner kórsetken Oleg Sokolenkoǵa buıyrdy. Mýshek tulparymen Aınagúl Muńaıtpasova úzdik nátıjege qol jetkizip altyndy enshiledi.
Kedergilerdiń bıiktigi 130 sm bolatyn besinshi sanatta Shyńǵys Malıkadjar esimdi shabandoz óziniń eki atymen de qatar synǵa túsip altyn jáne qola júldelerdi qanjyǵalady. Bul synda Fandorın tulparymen Azamat Hasenov ekinshi oryn ıelendi.
Júlde qory 12 mıllıon teńgeni quraıtyn jarys jeńimpazdary bes nomınasııa boıynsha kýboktarmen, medaldarmen, dıplomdarmen jáne aqshalaı syılyqtarmen marapattaldy.
Is-shara Astana qalasy ákimdiginiń qoldaýymen jáne Astana qalasynyń Ulttyq jáne olımpıadalyq at sporty túrleriniń Federasııasynyń uıymdastyrýymen ótti.
