«Búgingi tańda eldi mekenderden 11 mln tekshe metrden astam qar shyǵaryldy, alaıda bul jumys barlyq óńirde tıisti deńgeıde júrgizilip jatqan joq. О́ńir ákimderi qar shyǵarý jumystaryn kúsheıtýleri qajet», dedi Álıhan Smaıylov.
Elimizdiń ońtústik óńirlerinde kúrdeli jaǵdaıdyń qalyptasýyna sý burý arnalarynyń, aryqtardyń, qorǵanysh jer úıindileriniń bolmaýy sebep bolǵan. Saldarynan Túrkistan, Jambyl jáne Almaty oblystaryndaǵy drenajdyq júıelerdiń jaýyn-shashynnyń kóp mólsherine qýaty jetpedi. Odan bólek Atyraýda qar kúrt erip, kóshelerdi sý basyp qalǵan.
«Aryqtardy, nóser kárizderin tazartyp, ýaqytsha jer úıindileri men bógetter salý qajet. Indýstrııa jáne ınfraqurylymdyq damý mınıstrligi men óńir ákimderi joldardy, kópirlerdi, sý ótkizý qurylystaryn bekitý jumystaryn jalǵastyrsyn», dedi Premer-mınıstr.
«Qazgıdromettiń» boljamynda aıtylǵandaı, naýryz aıynda elimizdiń ońtústik jáne shyǵys óńirlerinde aýa temperatýrasy men jaýyn-shashyn mólsheri normadan joǵary bolady dep kútilýde. Buǵan daıyn bolý kerek. Úkimet basshysy «Kóktem-2023» respýblıkalyq oqý-jattyǵý sharalary sheńberinde tasqyn qaýpi týyndaǵan jaǵdaıda naqty is-qımyl algorıtmin pysyqtaýdy, jarylǵysh zattar men ınertti materıaldardyń qajetti qoryn daıyndap, habarlandyrý júıeleriniń daıyndyǵyn tekserýdi tapsyrdy.
«Qosymsha kúshter men quraldar ornalasatyn jerlerdi, evakýasııalanatyn halyqty qabyldaý pýnktterin jáne aýyl sharýashylyǵy janýarlaryn kóshirý úshin qaýipsiz ýchaskelerdi anyqtaý qajet», dedi Álıhan Smaıylov.
