Áıelder kásipkerliginiń damýynda basty róldi memlekettik baǵdarlamalar, qoǵamdyq uıymdar men iri bıznes-kompanııalar atqarady.
Statıstıka ekonomıkadaǵy ShOB-tyń, ózin jumyspen qamtyǵandar sanynyń, shaǵyn jáne orta bıznestiń jumys istep jatqan jáne qaıta tirkelgen sýbektileri sanynyń ósý úlesin rastap otyr. Osylaısha, QR Ulttyq ekonomıka mınıstrliginiń málimetteri boıynsha respýblıkanyń IJО́-degi ShOB úlesiniń ósimi sońǵy jylda 16 paıyzdyq pýnktti qurap, 2022 jyly 33,5%-ǵa jetken. Jumyspen qamtylǵandar sany 35%-ǵa artyp, 3,5 mln adamdy qurady, olardyń 31%-y nemese 1 mıllıonyn áıel adamdar quraıdy. Jumys istep jatqan ShOB kásiporyndar sany 2012 jyldan bastap 44%-ǵa artyp, 1,4 mln adamnan asqan. Áıel adamdar shaǵyn jáne orta kásipkerliktiń 43,5% sýbektisine basshylyq etip otyr.
«Áıelder kásipkerligi taqyrybyn kóptegen alańdar qozǵaǵanyna, ári búgingi konferensııa jáne Qazaqstannyń Aýyl áıelderi forýmy sekildi is-sharalardyń ótkizilýine aıtarlyqtaı deńgeıde kómekteskenine asa qýanyshtymyz. Úkimettiń, qoǵamnyń jáne jekemenshik sektordyń bastamalaryn biriktire otyryp, áıelderdiń ekonomıkalyq múmkindikterin yntalandyrý, qamtamasyz etý jáne keńeıtý jobalary jalǵasyn tabýy tıis», dedi konferensııa moderatory jáne Qazaqstannyń Aýyl áıelderi forýmyn uıymdastyrý komıtetiniń tóraıymy Maıra Aısına.
Ulttyq ekonomıka, Eńbek jáne halyqty áleýmettik qorǵaý, Aýyl sharýashylyǵy mınıstrlikteriniń ókilderi aýyl adamdarynyń ómir súrý sapasyn jáne olardyń tabys deńgeıin arttyrýǵa tıisti jaǵdaı jasaýǵa arnalǵan memlekettik qoldaý kórsetý sharalary týraly ózekti málimetterimen bólisti. Qoldaý kórsetýdiń negizgi quraldary – paıyzdyq mólsherlemeni sýbsıdııalaý, kásipkerlerdiń nesıelerine kepildik berý jáne memlekettik granttar berý, sonymen qatar retteýshilik saıasatty odan ári jetildirý.
«Áıelder kásipkerliginiń ósýi memleket tarapynan qoldaý kórsetýshi sharalarmen ári qoǵamdyq uıymdar men bıznestiń belsendi rólimen tyǵyz baılanysty», dedi «Áleýmettik dınamıka» qoǵamdyq qorynyń dırektory jáne «Belester» áıelder kásipkerligin damytý áleýmettik jobasynyń uıymdastyrýshysy Elena Ojgo.
Qazaqstanda bızneske áıelderdiń qatysýy damyp jatqanyna qaramastan, áıelder bıznes bastaýda da, ony basqarýda da, ásirese bastapqy kezeńderde kóptegen qıyndyqtarǵa tap bolady. Basqasymen qatar, bul qarjylandyrýdyń jetispeýshiligimen, sonymen qatar aýyldy jerlerde qajetti daǵdylar men aqparattyń jetispeýshiliginen bolyp otyr. Búgingi konferensııany uıymdastyrýshylardyń pikirinshe, atalmysh problemalardy sheshýdiń joly – sapaly netvorkıng, ıaǵnı bıznesti uıymdastyrýda qol jetkizýdiń qarapaıymdylyǵy, óz jobalaryn qarjylandyrýǵa múmkindik alý.
«Qazaqstanda jeke bıznes pen úkimettik emes uıymdar tarapynan áıelder kásipkerligin qoldaý boıynsha keminde bes iri joba bar. Olardyń ishindegi eń uzaq merzimdisi - «Belester» jobasy 10 jyl ishinde kásipkerlik kýrstarynda elimizdiń qalalary men aýyldarynda 62 myńnan astam áıeldi daıyndady. Joba aıasynda bıznesti damytýǵa 117 shaǵyn grant berildi. 2023 jyly taǵy 20 grant berý jáne keminde 15 myń áıeldi oqytý josparlanyp otyr. Oqytý erler úshin de qoljetimdi, biraq granttar konkýrsyna tek áıelder ǵana qatysa alady», dedi Qazaqstandaǵy «Belester» jobasyn qarjylandyratyn halyqaralyq qaıyrymdylyq qorynyń ókili Aleksandra Akkırman.
