Ortalyq memlekettik organdar men ákimdik basshylary Almaty aglomerasııasy, Qonaev qalasy, G4 City ıntegrasııalanǵan qalasyn jáne jalpy óńirdi damytý jónindegi sharalar týraly baıandady. Turǵyn úı, ákimshilik jáne áleýmettik maqsattaǵy obektilerdi salý, avtokólik, temirjol, ınjenerlik jáne agrarlyq ınfraqurylymdy jańǵyrtý, jerdi aýyl sharýashylyǵy aınalymyna tartý, ındýstrııalyq aımaqtar men ónerkásip obektileriniń tıimdiligin arttyrý, jańa ınvestısııalyq jobalardy iske asyrý týraly áńgime qozǵaldy.
Atap aıtqanda, Qonaev qalasyndaǵy káriz-tazartý qurylystaryn rekonstrýksııalaý MJÁ tetigi arqyly júrgiziletini atap ótildi. Máselen, jeke áriptes anyqtalǵannan keıin KTQ qurylysyna jobalyq-smetalyq qujattamany ázirleý bastalady.
Sonymen qatar keńeste respýblıkalyq jáne halyqaralyq deńgeıde de kóptegen kórermen tartatyn iri mádenı-sporttyq is-sharalardy uıymdastyrý jáne ótkizý máseleleri talqylandy. Solardyń biri – MotoGP motosıkl jarysy boıynsha álem chempıonaty.
Talqylaýdy qorytyndylaı kele, Álıhan Smaıylov barlyq qatysýshy memlekettik organdar jańa oblys ortalyǵy – Qonaev qalasyn, G4 City qalasyn jáne búkil óńirdi damytý jónindegi tapsyrmalardy oryndaýǵa jaýapkershilikpen qaraý qajettigin atap ótti.
«Biz barlyq suraqtardy talqyladyq. Memlekettik organdar qoıylǵan mindetterdi tıisinshe pysyqtaýy qajet. Oblys turǵyndary Qonaev pen óńirdiń qarqyndy damýyn kútip otyr, sondyqtan qazir ákimshilik rásimderdi keshiktirmeı, qajetti sheshimder qabyldaý mańyzdy», dedi Premer-mınıstr.
Úkimet basshysynyń aıtýynsha, qabyldanyp jatqan sharalar oblystyń damýyna eleýli serpin berýi tıis, bul óz kezeginde óńir turǵyndarynyń ómir súrý sapasy men ál-aýqatyn arttyrýǵa múmkindik beredi.
