Jalpy, kúıshiniń dombyrasy qazir Yqylas atyndaǵy halyq mýzykalyq aspaptar mýzeıi qorynda tur. Shanaǵy quralyp jasalǵan, qalaqsha pishindi qymbat qazynany alǵashynda Qazanǵap murasyn tanytýǵa erekshe úles qosqan dáýlesker dombyrashy Sádýaqas Balmaǵanbetov saqtaǵan eken. Keıinnen baryp Almatydaǵy mýzeıge ótkizilgen. Al onyń kóshirmesin jasatyp, Qyzylordaǵa jetkizgen Qazaqstannyń eńbek sińirgen qaıratkeri, belgili jyrshy, Qazanǵap atyndaǵy Qyzylorda mýzykalyq joǵary kolledjiniń dırektory Uljan Baıbosynova. Kúıshi atyndaǵy óner ordasyn basqaryp otyrǵan Uljan Málikaıdarqyzy dombyra kóshirmesin mýzeıge tapsyryp, Qazanǵap qazynasyn túgendeýge qatysty josparlary jaıly aıtty.
– Áý basta biz kóshirmeni kolledj úshin jasatqanbyz. Keıin oılana kele ótken jyldyń aıaǵynda daıyn bolǵan aspapty mýzeı qoryna qosqanymyz jón degen sheshimge keldik. Dombyrany jasaǵandar Syr óńirinen shyqqan belgili qolóner sheberleri aǵaıyndy Dilmanovtar. Búgin jınalǵandar olardyń qolynan shyqqan kóshirme aspap dybysynyń túpnusqadan esh aıyrmashylyǵy joǵyna kóz jetkizdi. Jalpy, Qazanǵap qazynasy ushan-teńiz dúnıe. Alda «Jádigerlerdi sóıletý» atty joba aıasynda tarıhı-tanymdyq is-sharalar ótkizgimiz keledi. Sonyń aıasynda Qazanǵap atamyzdyń kúılerin nasıhattap, dombyranyń Almatydaǵy túpnusqasyn Qyzylordaǵa ýaqytsha kórmege aldyryp, belgili qazanǵaptanýshylardy shaqyrý oıda bar, – deıdi ol.
Osy ýaqytqa deıin Qazanǵaptyń kóp týyndysy bizge belgisiz bolyp kelgen. Jaqynda ǵana osy baǵytta 45 jyldan beri zertteý júrgizip kele jatqan belgili óner zertteýshisi, Qazanǵap mektebiniń negizgi ókilderiniń biri Abdýlhamıt Raıymbergenov úshtomdyq jınaq shyǵaryp, uly kúıshiniń seksenge jýyq týyndysyn jurtshylyqqa tanystyrdy. Jalpy, Aral teńizi jaǵalaýyndaǵy Qulandy túbeginiń Aqbaýyr degen jerinde on toǵyzynshy ǵasyr ortasynda dúnıege kelip, ózindik oryndaýshylyq mektebin qalyptastyrǵan Qazanǵaptyń týyndylary keıingige sol mektep ókilderi arqyly jetip, eldiń rýhanı baılyǵyna aınalǵan.
Qyzylorda
