6 aqpanda Túrkııanyń ońtústik-shyǵysynda jáne Sırııanyń soltústiginde eki márte úlken jer silkinisi boldy. 448 myńnan astam adam evakýasııalandy. 20 myńnan astam ǵımarattyń qıraǵan ornynda izdestirý-qutqarý jumystary júrgizildi.
45-ten astam memleket japa shekkenderge qol ushyn sozdy. Apattyń saldaryn joıý úshin qarjylyq kómek kórsetti. Qazaqstan da jaǵdaıǵa beı-jaı qaramaı, apat aımaǵyna shuǵyl túrde qutqarýshylar men dárigerlerdi, sonymen qatar avarııalyq-qutqarý jabdyqtarynyń 150-ge jýyq túrin jiberdi.
– Memleket basshysynyń tapsyrmasymen osyndaı syn saǵatta Ulttyq ulannyń áskerı qyzmetshileri de jer silkinisi saldaryn joıý jumystaryna qatysyp, gýmanıtarlyq júkterdi tasymaldady. Ushqyshtar Sırııaǵa 4 reıs, Túrkııaǵa 2 reıs jasady, – dedi Ishki ister mınıstri Marat Ahmetjanov.
Opattan oıran bolyp, zilzaladan japa shekkenderge qazaq eliniń atynan kómekke attanǵandardyń biri Berikbolsyn Habıbolla. Ol – 3656 áskerı bóliminiń lıterlik avıasııalyq jasaǵynyń keme komandıri. «Jaýyngerlik erligi úshin» medalimen marapattalǵan ulandyq apatty jerge ushý men qoný kezinde qıyndyqtardyń bolǵanyn aıtady.
– Sırııa memleketine ushý bul bizdiń onda birinshi ret ushýymyz bolǵandyqtan ekıpaj úshin qıynǵa tústi. Onda GPS-navıgasııa jumys istegen joq. Bul ushaqtardyń tolyq jumys isteýine kedergi keltiredi. Radıobaılanyspen de qıyndyqtar týyndady. Jer silkinisi kezinde Túrkııa men Sırııa elderiniń radıostansııalaryna úlken zaqym kelgen, – dedi ulandyq.
Onyń áriptesi Qurmanǵalı Topanov II dárejeli «Aıbyn» ordenimen marapattaldy.
– Jalpy negizgi qyzmetimiz osy. Sondyqtan barlyq qıyndyqtardy eńsere bildik. Bárimiz áskerı adam bolǵan soń, júktelgen mindetti múltiksiz oryndaýǵa tyrysamyz, – dedi QR Ulttyq ulanynyń 3656 áskerı bóliminiń avıasııalyq jasaǵynyń keme komandıri Qurmanǵalı Topanov.
Erlik – elge mura, urpaqqa – úlgi. Áskerı boryshyn abyroımen atqaryp kelgen jaýyngerlerge vedomstvo basshylyǵy qyzmette tabys tiledi.
