Balyqqa da bap kerek

Bıyl qys qatty boldy. Sa­qyl­daǵan sary aıaz sý tú­bin­degi tabıǵat baılyǵyna da qa­terin tóndirip jatyr. Keıbir kólderdegi muzdyń qalyńdyǵy – bir metrge jýyqtady. Soltústikke kóktem kelip, kól bitken muz qursaýynan qutylǵansha áli de tabandatqan aı jarymǵa jýyq ýaqyt bar. Mamandardyń aıtýyna qaraǵanda, muzdyń as-t­yń­ǵy qabatynda otteginiń tolaıym sarqylyp, kóp balyqtyń qy­na­daı qyrylatyny da – osy mezgil. Qazir óńirde bul tarap­taǵy qyrýar jumys qyzý qolǵa alynǵan. Aıtalyq, Zerendi aýda­nynyń kólderinde muz oıý jumystary uıymshyldyqpen júr­gizilip jatyr. Dalalyq kólder sanatyndaǵy Qurkóldiń de mu­zy qalyń. Bir aıta keterligi, balyq ta kóp kórinedi. Balyqty saqtap qalý úshin kún saıyn muz oıylady.

– Biz mundaı jumystardy qys boıy júrgizip kelemiz. Basty maqsat tabıǵattyń ıen baılyǵyn saqtap qalý ǵoı. Dál osyndaı ıgilikti is «Esil» basseıniniń aýma­­ǵynda da uıymdastyrylyp jatyr, – deıdi oblystyq balyq ınspeksııasynyń bas mamany Erlan Qosmaǵanbetov.

Oblysta balyq sharýa­shy­lyǵyn damytýǵa ábden jaramdy 600-ge jýyq sý aıdyny bar. Osy jyly osynaý kól­derdiń 132-sinde aerasııa júr­gizildi. Mamandar 7 myńnan asa oıyq oıypty. Oǵan qosa ba­lyq «patshalyǵyn» ottegimen qam­tamasyz etý úshin 400-den asa tusyn kesip, aýa ótkizetin oryn ázirlegen.

– Muz astyna ottegin ji­berýmen qatar, kól beti qoqys pen qamystan da tazartylady. Tamasha tabıǵatymyzdy aıalap, qamqorlyq kórsetip otyratyn bolsaq, júdemes edi. Keler urpaqqa qaldyratyn muramyz da osy emes pe? – deıdi balyq ınspeksııasynyń bas mamany Aqan Syzdyq.

Kólderdi tazartýǵa júzge jýy­­q adam kúshi tartylypty, arnaıy tehnıka da bólingen. Dál osylaı janashyrlyqpen kúsh biriktirilse, balyqtyń da baǵy taımaıtyn shyǵar.

Aqmola oblysy