Eki jastaǵy qaryndasyn janyp jatqan úıden aman alyp shyǵyp, qutqaryp qalǵan Nurıden Amantaı qazir el aýzynda. Atasy men ájesi sol órtte kúıik shalyp, qaıtys boldy. Al Nurıdenniń óziniń qoly men beti kúıip qalǵan. Bul kezde ata-anasy jumysta eken. Qaıǵyly oqıǵa byltyr jeltoqsan aıynda bolyp, tilsiz jaýdan úı tolyqtaı derlik janyp ketipti.
– О́rt shyqqanda úıde atam, ájem jáne qaryndasym boldyq. Biz tamaq iship otyr edik, pesh turǵan shyǵa beris bólmede tars ete qalǵan dybys shyqty. Atam men ájem ne bolǵanyn qaraýǵa dálizge ketti. Uzaq ýaqyt kelmeı qoıdy. Sońdarynan barsam, peshtiń mańaıy túgeldeı janyp jatyr eken. Bul bólmedegi esikten shyǵý múmkin emestigin túsindim de, as úıge júgirip baryp, qaryndasymdy tereze aldyna shyǵardym. Anama telefon soǵyp aıttym. Tereze aldyna shyǵyp alyp, odan sekirgeli turǵanda kórshiler keldi. Qaryndasymdy shyǵaryp berip, sońynan ózim tústim, – deıdi Nurıden.
Ata-ájesi de dalaǵa shyǵyp úlgergen eken. Áıtse de deneleriniń 40-60 paıyzyn jalyn sharpyp ótken. Dárigerler atasy men ájesin jansaqtaý bólimine, Nurıdendi jaı palataǵa jatqyzǵan eken. Biraq aýyr jaraqattan ata-ájesi ońalmaı, baqılyqqa ozdy.
– Men kelgende úı lapyldap janyp jatty. Ata-enem jan saqtaý bólimine tústi. Nurıden jaı palataǵa. Eki kúnnen keıin atam qaıtys boldy. Odan eki aptadan keıin enem. Qazir kúıeýimniń týystarynyń eki bólmeli páterinde turamyz. Olardyń ózinde bes bala bar, – deıdi Nurıdenniń anasy Nadıra Akısheva.
Nurıdenniń qaryndasynan bólek ápkesi men aǵasy bar. О́rt shyqqan kúni olar mektepte bolǵan eken. Al qazir otbasy baspanaǵa muqtaj. Jaqynda Nurıden oqıtyn №36 mektepke Qaraǵandy qalasy bilim bóliminiń basshysy Esentaı Áshim arnaıy kelipti. Batyldyq kórsetken Nurıdenge rızashylyǵyn bildirip, bilim bólimi atynan kishkentaı batyrǵa velosıped tartý etti.
Qaraǵandy
