Bul kúıdi General Asqarovtan keıin eshkim tartpaǵan da sııaqty. Kúı Súgirdiń ańyzben astas mahabbat jaıyn baıan etedi. Tektiden tekti aralap Naıman elinen aıttyryp alyp kelgen aıaýly jary, áıgili kúıshi Mafrýza bir jyldan soń kóz tıip qaıtys bolady. «Nazqońyr» – alǵashqy kúnderdiń qalyń qaıǵysyn, kúıshiniń basyn taý men tasqa soǵyp, boıyn órtegen qasiretten, ókinishten «ah» urǵan qııamet sátin beıneleıdi. Sondaı-aq bul kúıde Súgir alǵashqylardyń biri bolyp, adamnyń júregindegi táýbany beıneleıtin áýendi oılap tapqan, engizgen.
Sonaý tómengi saǵaǵa baryp, on eki músheni taldyrǵan, qaıǵyny sýdaı ishtirgen kúı joǵarǵy saǵaǵa qaıtyp kelip, kenet aýnap túsip, alqońyr áýenge aýysady. Osynshama qaıǵydan kelip kúıdiń majorǵa aýysýy basyndaǵy buraýdan aýytqymaıtyn, sol buraýmen aıaqtalatyn qazaq kúıi úshin jańa qubylys, syrt qulaqqa tipti jaǵymsyz modýlıasııa bolyp estilýi múmkin. Biraq qulaǵyńyz úırene kele Súgir kúıiniń bıik parasatyna bas urasyz.
Men Súgirdiń Abaı poezııasymen qanshalyqty tanys ekenin bilmeımin. Abaıdyń súıikti uly Ábdirahman ólgende qolyn júregine qoıyp, Jaratqan ıege taǵzym etip:
– Dúnıede, sirá, sendeı maǵan jar joq
Saǵan jar menen artyq tabylsa da, – degen.
Osyndaı uly qaıǵyny jeńgen, Alla Taǵala qandaı synǵa salsa da táýbasynan jańylmaǵan hákim Abaı Enjildegi Aıýp paıǵambarǵa teńelgen. Bul jóninde «Abai.kz» portalynda jarııalanǵan maqalada jazylǵan. Súgir Enjilden de beıhabar bolýy múmkin, basyna túsken qaıǵyny aıaǵyna deıin ózi keshken, táýbaǵa óz jolymen kelgen.
Áńgimelegen - Talasbek ÁSEMQULOV
