E.Ertisbaev Pavlodardaǵy «ÝPNK-PV» JShS eńbek ujymymen kezdesip, partııanyń saılaýaldy baǵdarlamasyn tanystyrdy. Zaýyt kúıdirilgen munaı koksyn óndirýmen aınalysady jáne eksportqa ónim jóneltedi. Partııa tóraǵasy zaýyt jumysshylaryna Qazaqstan Halyq partııasynyń saılaýaldy baǵdarlamasynda sosıal-demokratııalyq baǵytqa basymdyq berilgenin baıandady. «Áleýmettik ádilettilik ıdeıasy halyq arasynda ómirsheńdigin saqtap tur, ony júzege asyratyn ýaqyt keldi», dedi QHP tóraǵasy.
Halyq partııasy demokratııany, memlekettik basqarý men basqa da jetekshi salalardaǵy reformalardy, tegin medısına men bilim berýdi, turǵyn úı baǵdarlamasyn júzege asyrýdy, aımaqtardy damytýdy, olıgarhııamen kúresýdi, kúshti memleket qalyptastyrýdy jaqtaıdy. Orta tap pen eldiń barlyq azamatynyń ómir súrý deńgeıin kóterýdi qoldaıdy.
«Eńbek zańnamasyn túbegeıli ózgertý kerek, – dedi Ermuhamet Ertisbaev. – Kodeks jumys berýshilerdiń ǵana emes, qyzmetkerlerdiń de quqyǵyn qorǵaýy kerek. Sonymen qatar bizdiń partııa aýyr jáne qaýipti óndiristerde jumys isteıtinderdiń zeınet jasyn tómendetýdi jaqtaıdy.
Budan soń partııa tóraǵasy saılaýaldy úgit-nasıhat jumysy aıasynda qalalyq Mádenıet saraıynda halyqpen kezdesti. Is-shara barysynda QHP tóraǵasy qala turǵyndaryna partııanyń saılaýaldy baǵdarlamasyn qysqasha tanystyryp, saılaýshylarmen pikir almasty. Úgit-nasıhat jumysy suraq-jaýap formatynda ótti.
Al Parlament Májilisi depýtattyǵyna kandıdat, QHP Jetisý oblystyq fılıalynyń tóraǵasy Qaharman Jaqsylyq «Taldyqorǵan oblystyq áıelderdi qoldaý ortalyǵy» qoǵamdyq birlestiginiń ujymyna saılaýaldy úgit-nasıhat jumysyn júrgizdi. Ol Halyq partııasy áıelderdiń 58 jastan zeınetke shyǵý qozǵalysyn qoldaǵanyn, nátıjesinde 61 jastan zeınetke shyǵýǵa 5 jyl moratorıı jarııalanǵanyn atap ótti. «Halyq partııasynyń saılaýaldy baǵdarlamasynda kópbalaly analarǵa, tolyq emes otbasy men múmkindigi shekteýli balasy bar analarǵa qoldaý kórsetýge basymdyq berilgen», dedi Q.Jaqsylyq.
