Oraldyq Nazgúl Baımuqanovanyń búıregi 2007 jyly syr berdi. Sodan beri túrli em qabyldap, ýaqytynyń teń jartysyn aýrýhanada ótkizgen kórinedi.
Birneshe dárigerge qaralyp, ota da jasatty. Alǵashqy operasııa Almaty qalasynda ótti.
«Men qarjygermin. 20 jyldan beri bank qyzmetkeri bolyp jumys isteımin. 2007 jyldan bastap dertke shaldyqtym. Al 2016 jyly qatty aýyryp, alǵash ret búırek aýystyrdym. Bul aǵamnyń búıregi bolatyn. Sol búırekpen 4,5 jyl júrdim. Keıin qaıta aýyra bastadym. Eki jyl boıy gemodıalız qabyldadym. Sol kezde kúıeýimiz ekeýmiz taǵy da osy qadamǵa barýǵa sheshim qabyldadyq», dedi Nazgúl Baımuqanova.
Jubaıy Erkin Baımuqanov ishki ister organdary salasynda eńbek etip, zeınetke shyqqan.
Birneshe analız tapsyryp, nátıjesinde donor bola alatynyn túsindi.
«2016 jyly otbasymyzdyń barlyǵy sáıkestikti anyqtaý úshin analız tapsyrdyq. Sol jyly meniń búıregimdi áıelime salýǵa bolatynyn bildim. Bul Almatyda boldy. Dárigerler týystyq qarym-qatynas jaqsy dep topshalap, aǵasynyń búıregin salýǵa sheshim qabyldady. Al men qarsy bolmadym. Uzaq jyldarǵa kómektesedi dep oılaǵan edik. Biraq olaı bolmady. 2020 jyly aýrýy qaıta asqyndy. Bastan ótkengen jaǵdaıdy sózben jetkizý qıyn. Ol aýyrdy, al biz janynda júrip-aq onyń jan qınalysyn sezinip, kómektesýdi ǵana oıladyq. Týystaryma bul joly búırekti ózim beretinimdi aıttym. Tipti talqyǵa salmadyq. Sosyn Almatyǵa habarlasyp, sonda bardyq. Analız tapsyryp, Oraldaǵy nefrologtarmen aqyldasqan jaıymyz bar. Hırýrg-transplantolog Ǵanı Quttymuratovpen habarlasýǵa, keńesýge týra keldi. Ol birden kórshi oblys dep aqtóbelik dáriger týraly aıtty. Mundaǵy qural-jabdyqtar da zamanaýı talapqa saı. Ǵanı Quttymuratov Astanadan ózi kelip, janymyzdan tabyldy. Aqtóbe men Oral arasynyń jaqyn bolǵan oń áserin tıgizdi. Sebebi poıyzben barsaq, bir kúnnen soń gemodıalız alý kerek. Al ushaq kezinde qysym kúsheıedi. Biz munda úsh apta buryn keldik. 13 aqpanda kelgen kezde transplantologııa bóliminiń ujymy óte uıymshyl ekenin kórdik. Olar óz isiniń sheberleri. Kásibı biliktiligi kórinip turdy. Otaǵa deıin túrli analız tapsyryp, mamandar keńes ótkizdi. Bas dáriger Erlan Sultangereev, orynbasary Ardaq Beketqyzy da osynda júrdi», dedi Erkin Baımuqanov.
Qazirgi kezde olar tolyq emdi qabyldap, Oralǵa attandy.
Aldaǵy úsh aıda dárigerlerdiń baqylaýynda boldy.
«2014 jyly Aqtóbe medısına ortalyǵynda transplantologııa bólimi ashyldy. Sodan beri 80-ge jýyq búırek aýystyrý otasy jasaldy. Kóbine týystyq donor operasııasyna júginemiz. Al biz máıittik donordy damytýymyz kerek. Sebebi bul qaýipsiz. Jyl saıyn Aqtóbede 350 adam ınsýlt alyp, kóz jumady. Al olardyń jaqyndary aǵzasyn berýge qarsy shyǵyp jatyr. Bul durys emes. Eger biz 2014 jyldan beri máıittik donordy paıdalanǵan bolsaq, qazir kezekte turǵan adamdardyń bárin emdep, ota jasar edik. О́kinishke qaraı mentalıtet qolbaılaý boldy», dedi hırýrg-transplantolog Myltyqbaı Saǵynbekuly.
Al Oraldan Aqtóbege em izdep kelip, úlken úmiti aqtalǵan erli-zaıypty Baımuqanovtardyń qýanyshynda shek joq.
