Jıyn barysynda Qasym-Jomart Toqaev elimizdi damytý úshin saıası júıeni ǵana jańǵyrtý jetkiliksiz ekenin aıtty.
«Reformalar, eń aldymen, qoǵamda jańa saıası mádenıet qalyptastyrýy kerek. Sonymen birge jańa qundylyqtardy ornyqtyrýy qajet. Eń aldymen, el múddesine jáne ár adamnyń quqyǵyna basymdyq beriledi», dedi Prezıdent.
Sondaı-aq ol zań men tártip saqtalǵan jerde árdaıym turaqtylyq bolatynyn atap ótti.
«Geosaıası ahýal ýshyqqan kezde memlekettiń jáne azamattardyń jaýapkershilik júgi artady. Ańdamaı aıtylǵan bir aýyz sóz, oılanbaı qabyldanǵan bir sheshim elge zardabyn tıgizýi múmkin. Árıne, memleket sóz bostandyǵyna kepildik beredi. Árkimniń qalaýynsha qareket jasaýyna múmkindik bar.
Biraq bul bassyzdyqqa jol berý degen sóz emes. Árbir azamat eldiń tynyshtyǵyn jáne onyń aýmaqtyq tutastyǵyn saqtaýǵa qatysty zań talaptaryn múltiksiz oryndaýǵa mindetti. Zań men tártip bar jerde turaqtylyq bolady. Bul qaǵıda – barlyǵyna ortaq», dedi Memleket basshysy.
