Aýyldaǵy ınternettiń aýjaıy

Qazir ár memleket halyqty ınternet­pen qamtýdy arttyrý úshin túrli shara­lardy qolǵa alyp jatyr. Qajetti ınfraqurylymmen qamtamasyz etý qıyndyq týdyratyn aýyldyq jerlerge erekshe nazar aýdarylady. 2022 jyldyń sońynda álemde qala turǵyndarynyń ınternetpen qamtylýy 78 paıyzdan 82 paıyzǵa, al aýyldardyń úlesi 42 paıyz­dan 46 paıyzǵa ósken. Dúnıejúzilik jelige qoljetimdilik boıynsha aýyl men qala turǵyndarynyń arasyndaǵy alshaqtyq óte úlken.

Finprom.kz-tiń habarlaýynsha, aı­maq­tar boıynsha eń az aıyrmashylyq Eýro­pada baıqalady: qalalyq jerlerdegi kór­setkish – 91 paıyz, aýyldyq jerlerde­ – 83 paıyz. Jalpy, makroóńirler bo­ıynsha aýyl turǵyndaryn ınternetpen­ qamtý TMD elderinde 74 paıyzǵa, Amerıkada 68 paıyzǵa, arab elderinde 56 paıyzǵa teń. Qazaqstanda aýyl turǵyndaryn ınternetpen qamtý erekshe­ baqylaýǵa alynyp, respýblıka damýynyń basty mindetteriniń biri sana­lady.­ Eske sala keteıik, el halqynyń 7,5 mln-y nemese 38,2 paıyzy aýyldyq jer­de turady.

Qazirgi tańda elimizde aýyl tur­ǵyn­daryn ınternetpen qamtıtyn birqatar baǵdarlama bar. Sonyń eń bas­tysy – «250+»­ baǵdarlamasy. Baǵ­dar­la­many 250-den­ kóp turǵyny bar aýyldar­dy ınternet­pen qamtamasyz etetin «Kcell» AQ (Kcell jáne Astiv saýda­ belgileri), Tele2/Altel jáne «Kar-Tel» JShS (Beeline saýda belgisi) uıaly baılanys operatorlary júzege asyryp keledi.

Mysaly, 2020-2022 jyldary Kcell uıaly baılanys operatory mindetti baǵdarlamalar boıynsha 468 bazalyq stan­sany jáne aýyldyq jerlerde je­lini damytýdyń jeke baǵdarlamasy bo­ıynsha 550-ge jýyq bazalyq stansany­ ornatqan. Kompanııa keń jolaqty mobıldi qoljetimdilikti qamtýdy keńeıtý jáne baılanys sapasyn arttyrý­ boıynsha belsendi jumys júrgizip keledi. Byltyr Kcell aýyldyq eldi meken­derde 258 bazalyq stansany iske qosty.

«Barlyǵy 900 myńǵa jýyq adamǵa 3G tehnologııasyn paıdalana otyryp, al 660 myńnan astam adamǵa 3G/4G tehno­lo­gııasyn paıdalana otyryp ınternet berildi. Bıyl operator LTE jelisin ornatý arqyly taǵy 142 aýyldyq eldi mekendi keń jolaqty mobıldi ınternetpen qamtamasyz etýdi josparlap otyr. Qazirgi kúni osy tizimdegi 31 eldi mekenge LTE jelisi qosyldy. Sondaı-aq kompanııa 2023-2024 jyldarǵa arnalǵan óziniń jeke baǵdarlamasy bo­ıynsha aýyldyq jerlerde keń jolaqty mobıldi qoljetimdilik jelisin damytý­dy josparlap otyr. Osy jyldyń 6 naýryzyndaǵy jaǵdaı boıynsha bazalyq stansalar 7 eldi mekende iske qosylǵan jáne taǵy 10-ynda jumys júrgizilip jatyr», dep habarlady Finprom.kz.

Baǵdarlamalardy júzege asyrý jaǵdaıǵa oń áserin tıgizip jatyr. Máselen, Halyqaralyq elektrbaılanys odaǵynyń (ITU) dereginshe, Qazaqstandaǵy ınternettiń qoljetimiligi mynadaı: aýyldyq jerde – 94 paıyz, qala­da – 95 paıyz. Eldegi jaǵdaı ortasha­ álem­dik deńgeıden ǵana emes, sonymen­ qatar EAEO elderimen, sondaı-aq kóp­te­gen damyǵan elmen salystyrǵanda álde­qaıda jaqsy. Máselen, Armenııada aýylda­ ınternet qoljetimdiligi 90 paıyzǵa, Belarýste – 79 paıyzǵa, Reseıde 78 paıyzǵa teń. Keıbir damyǵan elderde aýylda ınternetpen qamtamasyz etilgen paıdalanýshylardyń úlesi kelesideı: Shveısarııada – 95 paıyz, Japonııada – 87 paıyz, Italııada – 74 paıyz, Kanadada – 77 paıyz, Belgııada – 93 paıyz, Fransııada – 85 paıyz.

Sektordyń osyndaı qarqyndy damýy úshin baılanys operatorlary buryn-sońdy bolmaǵan kólemde qarajat salyp jatyr. 2022 jyldyń qorytyndysy bo­ıyn­sha, aqparat jáne baılanys salasyna­ sa­lynǵan ınvestısııa bir jylda 39,1 pa­ıyzǵa ósip, 178,9 mlrd teńgege jetti. Bul­ tarıhı kórsetkish. Uzaqmerzimdi dınamıkada ınvestısııa kólemi birtindep ulǵaıa bermek.