El erteńine senimdi

Tańǵy saǵat onǵa deıin saılaý­shylardyń 15,1 paıyzy daýys berip úlgerdi. Belsendilik birshama joǵary. Oblys ortalyǵy men shal­ǵaıdaǵy shaǵyn aýyldarda bel­sendilik tanytýda. Aıtalyq, Bir­jan sal aýdanyndaǵy 31 saılaý ýchaskesinde 9 465 saılaýshy tirkel­gen bolsa, saǵat onǵa deıin 3 124 adam óz tańdaýyn jasap úlgerdi.

– Saılaýshylardyń belsen­diligi birshama joǵary. Demalys kún bolǵandyqtan asyqpaı kelip jatqandar da bar. Saıası partııalar men qoǵamdyq birlestikterdiń baıqaýshylary saılaý barysyn qadaǵalap otyr, – deıdi aýdandyq ishki saıasat bóliminiń jetekshisi Mırgúl Aıaǵanova.

El azamattarynyń óz saılaý ýchaskelerine baryp, daýys berýlerine barlyq jaǵdaı týǵyzylǵan. Naqtyraq aıtsaq, qalalyq jáne aýdandyq avtobýs baǵyttary óńirdiń barlyq eldi mekenderin qamtıdy. Tipti, Astana qalasynyń mańyndaǵy eldi mekenderde jol júrý tegin.

Qııandaǵy Qorǵaljyn aýdanynda da aımaq turǵyndary saıa­sı belsendilik tanytty. Bul aýdan­da uıymdastyrylǵan 17 saılaý ýchaskesine 5 216 saılaýshy tirkelgen. Qorǵaljyn aýdandyq máslıhatyna 28 úmitker bar. Saılaý barysyn «Amanat» partııasy men «Daýys» qoǵamdyq baıqaýshylary koalısııasy baqy­lady. Bul aýdanda saǵat 11-ge deıin saılaýshylardyń 1 176-sy nemese 22,5 paıyzy daýys berip úlgerdi.

– Úmitkerlerdiń senimdi ókil­deri de qatysyp jatyr. Ja­ýap­ty naýqan uıymshyldyqpen ótkizilip jatyr, – deıdi aýdandyq ishki saıasat jáne tilderdi damytý bóliminiń basshysy Gúlnár Syzdyqova.

Oblys ortalyǵynda da saıa­sı naýqan barysynda jalpaq jurttyń el erteńine zor senimmen qaraıtynyn ańǵarýǵa bolady.

Aqmola oblysy