Qasym-Jomart Kemeluly kóptegen bastamalardyń sátti júzege asyp jatqanyn aıtty.
«Men dál bir jyl buryn tyń bastama kóterdim. Elimizdi túbegeıli jańǵyrtý úshin aýqymdy reformalar usyndym. Halyq bul bastamalardy qoldady. Biz josparymyzdy bir jylda tabysty júzege asyrdyq.
Referendým arqyly Konstıtýsııaǵa mańyzdy ózgerister engizdik. Bılik júıesin qaıta jasaqtaý úshin mańyzdy saıası sharalar iske asyryldy», dedi Memleket basshysy.
Prezıdent 19 naýryz kúni ótken saılaýdyń mańyzyn aıtyp, onyń naýryz merekesimen qatar kelýi beker emes ekenin atap ótti.
«Keshe ǵana ótken Májilis pen máslıhattar saılaýy – búkil reformalarymyzdy alǵa bastaıtyn óte mańyzdy qadam. Bul saılaý – aýqymdy ózgeristerdiń laıyqty jalǵasy. Osylaısha, memleketimiz jańa dáýirge qadam basty. Jalpy elimizdiń jańa saıası kelbeti qalyptasty. Tarıhı sát Ulystyń uly kúnimen tuspa-tus kelip otyr. Munyń zor sımvoldyq máni bar», dedi Prezıdent.
