Jerdiń tońy jibigende, eldiń óńin jylyttyq...

Máselen, «Tobyl» fýtbol klýby naýryz bastalǵaly Qostanaı, Tobyl, Rýdnyı, Lısakov qalalary men Qosta­naı aýdanynda turyp jatqan kópbalaly otbasylar men muqtaj jandarǵa áleýmettik azyq-túlik qorjyndaryn taratyp, qarjylaı demeý jasap jatyr.

– Búginge deıin 20 shaqty otbasyna bardyq. Olardyń ishinde 4 otbasy belgili bir sebeptermen memlekettiń ataýly áleýmettik kómegin ala almaı otyr. Biz aldyn ala habarlasyp, ne qajet ekenin bilip alǵannan keıin baramyz. 70-80 myń teńgege azyq-túlik qorjynyn, turmysqa qajet zattardy aparyp berip jatyrmyz. Munyń syrtynda, ár otbasyna 30-40 myń teńgeden qarjylaı kómek kórsettik. Bul ıgi iske klýb qyzmetkerleri, bapkerler, fýtbolshylar atsalysyp jatyr. Naýryz aıyn bekerge tańdap alǵan joqpyz. Halqymyz Naýryz – jańarýdyń, jaqsy­lyqtyń basy dep yrymdaıdy. Áý basta bul týraly fýtbol klýbymyzdyń sport dırektory Nurbol Jumasqalıev oı tastady. Ol kisi muqtaj jandardy ózi izdep taýyp, únemi kómek berip júretin. Qandaı otbasylarǵa barý kerek ekenin áleýmettik qorǵaý mekemeleri arqyly aldyn-ala bilip aldyq. Bul asyp-tasyp bara jatqan soń qolǵa alynǵan shara emes, nur shashqan Naýryz merekesiniń ozyq dástúrlerin jańǵyrtý arqyly jalpy jurtty jaqsylyqqa, izgilikke úndeýdi kózdedik. Bul endi bizdiń jyl saıyn ótip otyratyn dástúrli sharamyz bolady, – deıdi «Tobyl» FK-nyń qyzmetkeri Qasqyrbaı Qoıshymanov.

Fýtbolshylar ózderi aralap shyqqan úılerdiń ishinen 5 otbasyn tańdap alyp, turaqty túrde qamqorlyqqa alǵan. Máse­­len, Rýdnyıǵa О́zbekstannan kó­ship kelgen Tursaǵulovtar otbasy 7 bala tárbıelep otyr. Jeti balanyń ekeýi DSP-men aýyrady.

– Sol eki balanyń emine kómektese­miz. Munyń syrtynda, jaqyn arada páter alyp berýge járdem beremiz degen sheshim qabyldadyq. Qostanaı aýdanynda turatyn bir otbasyna bardyq. Úsh balasy bar. Eki balasy – kemtar. Jas ana soǵan qaramastan, «Bıznes bastaý» memlekettik baǵdarlamasy arqyly nesıe alyp, úıinde toqash, tort, bálish tárizdi jyly-jumsaq táttiler pisirip, onysyn áleýmettik jeli arqyly jarnamalap, turaqty tutynýshylaryna satyp, tabys taýyp otyr. Ol kisige óte rıza boldyq. «Qulynshaqtarym kúlgen saıyn kúsh-qýat alam, kóńil-kúıim kóterilip, sharsha­ǵanymdy umytyp ketem» deıdi. Osy naýryz aıynyń sońyna deıin 100 úıge kómektesemiz dep josparlap qoıdyq. Tipti, shalǵaı aýyldarǵa deıin baryp, turmysy tómen otbasylarǵa kómek kórsetip, bir aýyq bolsa da, kóńilderin aýlap qýantyp ketýdi oılastyryp otyrmyz, – deıdi Qasqyrbaı Qoıshymanov.

Sportshylar aldaǵy ýaqytta «Aýla sportynan – aýyl sportyna» dep ata­latyn taǵy bir áleýmettik jobany qolǵa almaq. Mundaǵy maqsat – aýyl-aýyldy aralap, sportqa talaby bar balǵyndarǵa óńirge belgili fýtbol­shylardyń qoltańbasymen dop, tennıs ústeli, sport kıimderi sııaqty tartý-taralǵylar syılaý. Bul aýyl balalary úshin esten ketpes ónegesi mol úlken oqıǵa bolatyny anyq. Úlken sportshylarmen áńgimelesip, olardyń qolynan syılyq alý, ataqty fýtbolshymen birge sýretke túsý degen qaı balaǵa da úlken qýanysh.

Jaqsylyqtyń úlken-kishisi joq. Jerdiń tońyn jibite almaǵanymen, eldiń óńin jylytyp, Tobyl óńirin­degi keńpeıil kóptiń kóńiline kóktem qonaqtatqan Naýryz merekesi qarsańyn­da árkim qolynan kelgenshe izgilik jasaýǵa umtylatynyn kórdik. Máselen, jalǵyz kóligimen nápaqa taýyp júrgen qarapaıym taksı júrgizýshi Oralbaı Jumashev naýryz aıy bastalǵaly kúnine eki jolaýshyny baratyn jerine tegin aparyp júr.

– Negizi joǵarǵy bilimim bar. Laıyq­ty jumys bolmaǵan soń, osydan on shaq­ty jyl buryn taksıge shyqtym. Qazir ábden úırenip aldym. Naýryz adamdy jaqsylyqqa jeteleıtin qasıetti aı ǵoı. Sondyqtan tańerteń birinshi jolaýshyny, keshkilik eń sońǵy jolaýshyny tegin aparyp júrmin. Aqshadan góri aqjarma kóńilden shyqqan shynaıy alǵys qymbat. Jolaýshyny qoıyp, ózime-ózim rıza bolyp, úıge kóterińki kóńil-kúımen qaıtyp júrmin. Tegin aparǵannan tabysym kemip jatqan joq, – deıdi taksı júrgizýshi.

Qostanaı oblysyndaǵy etnomádenı birlestikter de «Naýryz – dostyq pen izgiliktiń merekesi» atty qaıyrymdylyq aksııasyn ótkizip jatyr. Izgi sharalar barysynda tájik, ózbek, qyrǵyz aǵaıyndar oblys ortalyǵyndaǵy «Januıa» balalar úıine baryp, túski asqa palaý basyp, balalarǵa merekelik tartý-taralǵylaryn úlestirdi. Al «Erebýnı» atty armıan ulttyq birlestiginiń ókilderi kámeletke tolmaǵan jasóspirimderge arnalǵan beıimdeý ortalyǵynda jatqan balalarǵa tátti taǵamdar men kıim-keshek aparyp berdi. Naýryz qarsańyndaǵy qaıyrymdylyq sharalarynan ózge ulttyq birlestikter de qalys qalyp jatqan joq. Máselen, «Asar» dep atalatyn belarýs etnomádenı birlestigi qan ortalyǵyna baryp, «Men – donormyn» aksııasyn uıymdastyrdy.

Naýryz merekesi qarsańynda «Beef Export Group» et óńdeý kombınatynyń ókilderi de birneshe balalar úıine baryp, merekelik Naýryz-qorjyndaryn úlestirdi. Atalǵan kombınat – et ónim­derin qaldyqsyz óńdeýmen aınalysatyn elimizdegi eń iri kásiporynnyń biri. «Beef Export Group» óniminiń 97%-y ishki naryqta sýdalansa, 3% paıyzy syrtqa eksporttalady.

– Naýryz merekesi qarsańynda oblys­tyq kásipkerler palatasy birta­laı ıgi sharalardy uıymdastyryp, jaqsy isterge muryndyq bolyp otyr. Atap aıtar bolsaq, 14 naýryz – Kóri­sý kúninen beri óńirdegi on shaqty kásip­orynmen birlesip, «Naýryz qor­jyn» qaıyrymdylyq aksııasyn ótkizip jatyrmyz. Búgin «Beef Export Group» kombınatynyń ókilderi birneshe balalar úıine arnaıy baryp, merekelik dastarqan jaıyp, balalarǵa kompıýter, teledıdar, velosıped, taǵy basqa da baǵaly syılyqtar tartý etti, – deıdi Qostanaı oblystyq kásipkerler palata­synyń ókili Elena Kasharına.

Qostanaı oblysy