Elordada Naýryz kóje daıyndaýdyń rekordtyq mejesi qoıyldy

Naýryz meıramy Baıqońyr aýdanynda úzdik dástúrlermen atap ótiledi.

Meıramnyń kópten kútken sátteriniń biri – naýryzkójeniń eń kóp kólemin daıyndaý boıynsha rekordty tirkeý boldy. Dámdi asty daıyndaý úshin aspazshylarǵa týra bir kún ýaqyt jáne júzdegen kılogramm bıdaı, kúrish jáne et qajet boldy. Naýryzkóje Atatúrik saıabaǵyna kelgen jurtshylyqqa tegin taratyldy.

«2 myń 140 lıtr naýryzkóje – absolıýtti rekord. Buryn bul asty daıyndaý kórsetkishi túrkistandyqtarǵa tıesili bolǵan. Eki jyl buryn olar 2 myń lıtr naýryzkóje daıyndaǵan bolatyn. Búgin ol rekord resmı túrde jańartyldy», dedi Qazaqstannyń Gınnes rekordtar kitabynyń resmı ókili Qýandyq Qudaıbergenov.

Aspazshy Gúlnar Jumabekova naýryzkóje kólemi 60-tan 150 lıtrge deıingi 10 qazanda daıyndalǵanyn atap ótti. Sodan keıin olar árqaısysy 95 lıtrlik 20 ydysqa quıyldy.

«Merekeniń basty taǵamyn múmkindiginshe kóp adamǵa ishkizýge tyrysamyz. Bizdiń úsh aspaz ony bir kún boıy qaınatty. Naýryzkójeniń quramynda qurt, qazy, jylqy eti, tary, bıdaı jáne kúrish bar. Mundaı ıdeıa astanalyqtardy qýantyp, barlyǵyna kóktemgi kóńil-kúı syılaǵymyz kelgendikten paıda boldy. Biz úshin bul tarıhı sát. Naýryz meıramyn jaqsy kóremiz», dedi ol.

Is-sharaǵa Astana qalasy ákiminiń orynbasary Eset Baıken men Baıqońyr aýdanynyń ákimi Erlan Jaýlybaev qatysyp, astanalyqtarǵa amandyq, densaýlyq, beıbitshilik pen kelisim jáne jańa jylda bar jaqsylyqty tiledi.