Qoǵam • 23 Naýryz, 2023

Búgin orazanyń birinshi kúni

Búgin Islam álemi úshin qasıetti sanalatyn Ramazan aıy bastaldy. Oraza 23 naýryzdan 21 sáýirge deıin jalǵasady, dep habarlaıdy Egemen.kz.

Gúlshahra SANSYZBAI

Sáýir aıynyń 17-nen 18-ine qaraǵan tún – qasıetti Qadir túni, 21 sáýir – oraza aıt merekesi.

Oraza - bir nárseden alystaý, belgili bir ýaqyt aralyǵynda iship-jeýden, nápsi qalaýlarynan tyıylý degendi bildiredi.

Sáresin ishý tań namazynyń ýaqyty kirýine 10 mınýt qalǵanda toqtatylady. Oraza tutý – musylman qaýymynyń bes paryzynyń biri.

Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanuly otandastardy Ramazan aıynyń kelýimen quttyqtady.

«Sharıǵat boıynsha balıǵatqa tolǵan, aqyl-esi durys árbir musylmanǵa Ramazan aıynda oraza ustaý – paryz. Alaıda jolaýshylar, naýqas jandar men syrqaty asqynyp ketýinen qaýiptengen adamdar, júkti nemese emizýli balasy bar áıelder oraza ustaýdy keıinge qaldyrýyna bolady. Buǵan sharıǵatymyz ruqsat beredi. Ramazan aıynyń qadir-qasıetin tereń túsingen izgiler «Rabbymyz, bizdi Ramazan aıyna aman-esen jetkize gór!» dep duǵa jasaǵan. San ǵasyrdan beri Islam dinin rýhanı tiregi etken halqymyz berekeli Ramazan aıyn erekshe daıyndyqpen kútedi. Saýaptar eselenip jazylatyn aıda aýyzashar berip, kómekke muqtaj jandarǵa pitir sadaqasyn úlestirip, úlkenderdiń alǵysy men batasyn alýǵa tyrysady. Orazada ıgi nıetpen oryndalatyn izgi amaldar búginde salt-dástúrimizge aınalyp, urpaqtan-urpaqqa jalǵasyp keledi», dedi Naýryzbaı qajy Taǵanuly.

Bıylǵy pitir sadaqasy jan basyna 535 teńge bolyp bekitildi. Pitir sadaqasy mólsheri elimiz boıynsha eki keli unnyń ortaq baǵasy negizinde belgilendi. Pitir sadaqasyn qurma, meıiz baǵasymen berýge bolady.