Eldostyń maket kúıindegi «aqyldy» fermasynda jumys prosesi avtomattandyrylǵan. Bul fermadaǵy jumysty qashyqtan basqarýǵa, fermerdiń jumysyn jeńildetý arqyly onyń ýaqytyn únemdeýge múmkindik bar. Bul jobany júzege asyrý úshin oqýshyǵa ınformatıka pániniń muǵalimi Aıgúl Shahamanova qoldaý kórsetti.
Eldos «Aqyldy» fermanyń maketin jasaýda úshólshemdi grafıkany tez qurýǵa jáne óńdeýge arnalǵan kompıýterlik baǵdarlamany qoldanǵan.
«Ýltradybystyq datchık adam nemese maldyń «aqyldy» fermaǵa jaqyndaǵanyn sezip, servodatchıktyń kómegimen shlagbaým kóterilip, birneshe sekýndtan keıin jabylady.
Fermadaǵy datchıkter arqyly jumys isteıtin apparattar malǵa ýaqtyly jem-shóp, sý berip, túngi jaryqpen qamtamasyz etedi, maldy ári-beri júrgizdirip nemese júgirtip turady. «Aqyldy» fermadaǵy jumysty mobıldi telefonǵa ornatylǵan baǵdarlama arqyly basqarýǵa da bolady», deıdi jas ónertapqysh.
Eldostyń bul jobasy ǵylymı jobalar baıqaýynyń aýdandyq kezeńinde I orynǵa, al oblystyq kezeńde II orynǵa ıe boldy.
