Sýretterdi túsirgen Erlan OMAR, «EQ»
«Qazaq qazetteri»-niń qoldaýymen ótken týrnırge 2012 jyly dúnıege kelgen balalardan quralǵan on komanda qatysty.
Jarystyń bir ereksheligi, týrnırge qatysqan barlyq komandaǵa júlde úılestirildi. Erejege saı «A» toby men «V» tobynyń jeńimpazdary «Altyn kýbok» úshin, toptan ekinshi oryn alǵandar «Kúmis kýbok» úshin, al úshinshi oryn alǵan komandalar «Qola kýbok» úshin talasqa tústi.
– Alash-CUP týrnıriniń ataýynyń ózinde úlken mán-maǵyna jatyr. Jarysqa qatysyp jatqandardyń barlyǵy da Alash urpaqtary. Meniń uldarym da osy týrnırde dop teýip júr. Mundaı jarys jastarǵa kerek. Sondyqtan bastaý alǵan Alash-CUP týrnıriniń ǵumyry uzaq bolsyn jáne jarysqa qatysyp jatqan balalardy quttyqtaımyn, – dedi «National Geographic Qazaqstan» jýrnalynyń dırektory Aıbyn Shaǵalaq.
Úsh kúnge sozylǵan dodada kýbok jeńimpazdary anyqtaldy. «Qola kýbok» úshin ótken fınaldyq aıqasta Shymkenttiń Namys-2 komandasy El Clasico-dan 1:0 esebimen basym túsip, chempıon atansa, «Kúmis kýboktiń» jeńimpazy Dream team jáne Commandos arasynda anyqtaldy. Nátıjesinde, qarsylas komandaǵa bir gol soqqan Dream team «Kúmis kýboktiń» ıegeri boldy. Al respýblıkalyq jáne halyqaralyq jarystarda júlde alyp júrgen Namys pen Aibyn komandalary «Altyn kýboktiń» fınalynda kezdesti. Bul kezdesý jankúıer bolyp kelgen ata-analardyń jadynda uzaq este qalary anyq. Sebebi 40 mınýt boıy eki komanda da alma-kezek shabýyldaýmen boldy. Áıtkenmen, óz múmkindikterin múlt jibermegen Shymkenttiń Namys komandasy aıbyndyqtarǵa jaýapsyz úsh gol soǵyp týrnırdiń basty júldesin jeńip aldy. Sondaı-aq toptan shyǵa almaǵan komandalar birden qola medalmen marapattaldy.
– Mundaı joǵary deńgeıdegi jarys jıi uıymdastyrylsa deımiz. Sebebi qys mezgilin aıtpaǵannyń ózinde kóktem kezinde fýtboldan balalar týrnıri uıymdastyryla bermeıdi. Ásirese soltústik aımaqtarda jarys tym az ótkiziledi. Dopty serik etken balalar deńgeıiniń ósýine Alash-CUP týrnıri óz paıdasyn tıgizdi dep oılaımyn. Úsh kún boıy balalar úshin meıram boldy. Qatysqan barlyq on komandaǵa medal berilgen birden-bir jarys desem, qate aıtpaǵan bolar edim, – dedi týrnırdiń bas tóreshisi Sanjar Sultanqulov.
Atalǵan týrnırde «Eń úzdik qaqpashy», «Eń úzdik qorǵaýshy», «Eń úzdik shabýylshy», «Eń úzdik oıynshy», «Eń mádenıetti oıynshy», «Eń jas fýtbolshy», «Úzdik goldyń avtory», «Eń úzdik jattyqtyrýshy» atalymy boıynsha da fýtbolshylar men jattyqtyrýshylar marapattaldy.
