Halyqaralyq bilim jetistikterin baǵalaý qaýymdastyǵy (IEA) 1995 jyldan bastap TIMSS zertteýin tórt jyldyq sıklmen ótkizip keledi. Aýqymdy zertteýge álemniń 60-tan asa eli qatysady. Al Qazaqstan 2007 jyldan beri turaqty qatysyp keledi.
Bilim berý salasyndaǵy sapany qamtamasyz etý komıtetiniń aqparaty boıynsha, bıyl sáýir aıynan bastap TIMSS-2023 halyqaralyq zertteýiniń negizgi kezeńi bastalady. Oǵan respýblıkalyq mańyzy bar 3 qala men 17 óńirdegi 195 mektepten 12 myńnan astam oqýshy qatysady.
«Zertteýdiń maqsaty – bastaýysh jáne negizgi mektep oqýshylarynyń jaratylystaný jáne matematıkalyq daıyndyǵynyń sapasyn baǵalaý. Zertteýge tórtinshi jáne segizinshi synyp oqýshylary, mektep ákimshiligi, matematıka jáne jaratylystaný pánderiniń muǵalimderi, tórtinshi synyp oqýshylarynyń ata-analary qatysady. Oqýshylar testileý men saýalnamadan ótedi. Ata-analar, ákimshilik jáne muǵalimder arasynda saýalnama júrgiziledi. TIMSS zertteýi 2023 jyldan bastap kompıýterlik formatta ótkiziledi», dep túsindirdi komıtet tóraǵasy Ernur Dáýenov.
TIMSS zertteýi mekteptegi sabaqtastyqty baǵalaýǵa múmkindik beretinin aıta ketý kerek. Máselen, TIMSS-2023-ke qatysatyn segizinshi synyp oqýshylary TIMSS-2019-da tórtinshi synypta oqydy. Pedagogıkalyq qoǵamdastyq bastaýysh jáne negizgi mektep arasyndaǵy sabaqtastyqty qamtamasyz etý úshin jaratylystaný-matematıkalyq sıkl pánderin oqytýdyń jańa ádistemelerin paıdalana alady.
Sondaı-aq TIMSS zertteýi oqýshylardyń bilim deńgeıine áser etetin faktorlardy anyqtaýǵa kómektesedi. Zertteý nátıjeleri boıynsha Qazaqstannyń buǵan deıingi sıklderge qatysý qorytyndylaryn eskerip, ulttyq esep jarııalaıtyn bolady.
