Kúni keshe ǵana elorda tórinde – Ulttyq akademııalyq kitaphanada jazýshy-satırık, qoǵam qaıratkeri Kópen Ámirbektiń «Kópen kele jatyr!..» atty bestomdyq shyǵarmalar jınaǵynyń tusaýkeser rásimi bolyp ótti.
Saltanatty jıynǵa Nurtóre Júsip, Baýyrjan Omarov, Berdibek Saparbaev, Jarylqap Beısenbaı, Darhan Myńbaı, Islam Ábishev, Dıhan Qamzabekuly jáne basqa da belgili qoǵam qaıratkerleri men qalamgerler qatysty. Alǵash sóz tizginin alǵan Saýytbek Abdrahmanov satırık esiminiń dara sıpatqa aınalǵanyn jetkizdi.
– Osy 5 tomdyq shyqty degen kezde tań qalǵanym ras. Sebebi qaı ýaqytta jazyp úlgergen dep oıladym. Iýmor bar jerde adamnyń jasampazdyǵy kórinedi. Osy turǵydan qaraǵanda Kópen Ámirbek ótken ǵasyrdyń 70-80-90 jyldarynda qazaq mádenıetinde eleýli ról atqarǵan. Halqymyzǵa ejelden tán qaljyńdy, ótkir sózdi, syn-syqaqty jańa bir bıikke kótergen. Ospanhannyń dańqty dástúrin jalǵastyrǵan juldyzdy izbasary. Kópendi anyq moıyndaýdaǵy tıisti dúnıe onyń esimi. Biz Muqaǵalı, Farızalar, Qadyr, Ábishterdi famılııasyz aıtamyz. Kópen de sondaı sırek dańqqa ıe boldy, – dedi ol.
Al senator Nurtóre Júsip Kópen Ámirbektiń atqarǵan eńbekterin tilge tıek etti.
– Satıra salasynda Kópen Ámirbektiń orny da, aty da, eńbegi de erekshe. 2000 jyldary saılaýǵa Kópen aǵa da qatysqan. Joly bolmaı, ótpedi. Sol jaǵdaıdan keıin bir kúni kezdesip qaldyq. «О́zińizdiń únińizdi tanytyp, satıra salasynda emin-erkin júre bermeısiz be» dep jubatý sózderin aıtqan edim. Sodan keıin «Kópen kele jatyr!..» degen joba bastalyp ketti. Sol atpen mine halyqqa jattalyp qaldy. «Aıqyn» gazetinde «Ara» ataýymen arnaıy qosymsha shyǵyp kele jatyr. Bul da Kópen aǵaǵa kórsetilgen qurmet dep bilemiz, – dedi senator.
«Kópen kele jatyr!..» atty bestomdyq shyǵarmalar jınaǵynyń lentasyn Berdibek Saparbaev, Nurtóre Júsip, Baýyrjan Omarov, Islam Ábishevter qıdy.
– Kópenniń shyǵarmashylyǵy bala kúninen, qazaq gazetterinen bastaý alǵan. Eń alǵash sýret salyp, «Qazaqstan pıonerine» sýretin jiberedi. Biraq ol basylym betine shyqpaıdy eken. Kópekeń ıntellektýaldy satıranyń ıesi edi. Kez kelgen nársege daıarlyqpen keletin. L.N. Gýmılev atyndaǵy EUÝ-de birneshe jıyn boldy. Ol kisi sahnaǵa shyǵyp sóılegen kezde ǵylymı baıandamanyń satıralyq formatyn kórsetip ketetin,– dedi akademık Dıhan Qamzabekuly.
Moderatorlyq etken jýrnalıst-jazýshy Sharhan Qazyǵul kesh barysyn ázilmen ádiptep, satırıktiń keshi kóńildi ótti. О́z Kópenimen kelgen árbir zııaly qaýym ókili pikirlerinen jańa ıdeıalar túzilip, bolashaqtaǵy atqarylar is-sharalardyń sulbasy jasaldy.
