Otyz úsh jyldan beri shákirt tárbıelep kele jatqan Baǵdar Naǵymova týraly aıtqanda eriksiz oıǵa osyndaı sózder oralady. Joǵary sanatty pedagog zertteýshi eńbeginiń ótili – san túrli saıys pen báıgede oza shaýyp, úzdik nátıje kórsetip júrgen oqýshylary. Bul rette Batys Qazaqstan oblysyna qarasty Terekti aýdanynyń Podstepnyı №1 jalpy orta bilim beretin mektebiniń qazaq tili men ádebıeti pániniń muǵalimi Baǵdar Januzaqqyzynyń shákirtteri aýdandyq, oblystyq jarystardan júldesiz oralǵan emes. Máselen, Mádına Islıamǵalıeva, Aıjan Qanatova, Kırıll Svechnıkov, Valentın Kozlov, Nurdáýlet Mýtıev syndy shákirtteri oblystyq, respýblıkalyq dodalardan júldesiz qaıtqan emes.
Bilim júıesindegi pedagogıkalyq sheberligi men shyǵarmashylyq izdenisi muǵalimniń ózin de marapatsyz qaldyrǵan joq. О́skeleń urpaqty oqytý men tárbıeleý jolyndaǵy Baǵdar Januzaqqyzynyń jetistikteri de az emes. Oblystyq bilim basqarmasy Qurmet gramotasymen marapattalǵan ustaz «Til janashyry» atalymynyń ıegeri. «Ulaǵatty ustaz» X Respýblıkalyq oqytýshylar saıysynda 1-oryndy ıelengen áriptesimiz bıylǵy «Shyǵarmashyl pedagog» respýblıkalyq olımpıada da top jardy.
Oqytý orys tilinde júrgiziletin mektep oqýshylaryna arnalǵan qazaq tili men ádebıeti páninen olımpıada materıaldaryn daıyndap, avtorlyq baǵdarlama jazyp shyqqan pedagog oqýshylardyń bilim nátıjesi eń aldymen muǵalimniń jetistigin kórsetedi dep esepteıdi. «Ásirese, aýdandyq saıystar men pándik olımpıada qorytyndysy kez kelgen oqýshynyń bilimin shyńdap qana qoımaıdy, pán muǵaliminiń biliktiligin jetildirýge jańasha baǵyt-baǵdar silteıdi, jol ashady, izdeniske bet burǵyzady. Máselen, «О́leń jazdym toǵyz taraý, jeti órim, Sezdim sonyń júrekterge jeterin...» taqyrybyndaǵy Qadyr Myrza Álı shyǵarmashylyǵyna arnalǵan III ádebı konferensııa materıaldaryn daıyndaý kezinde ózim de ár oqýshynyń qarym-qabiletin, bilim deńgeıi men shyǵarmashylyǵyn saraptaýǵa basymdyq berdim. Sebebi oqýshy men muǵalim arasyndaǵy qarym-qatynas máselesi osyndaı qarapaıym túsinistikke qurylýdan bastalady», deıdi ol.
«Urpaq bolashaǵy, halqymyzdyń keleshegi qazirgi ustazdardyń qolynda. Táýelsiz el atanyp, tóbemizge tý tigip, tilimizdiń mártebesi artyp, álemge atymyzdy tanytyp jatqan kezeńde eldiń bolashaǵy jas urpaq tárbıesine de myqty kóńil bólinýge tıis. Al órkenıetke bastar joldyń bastaýy mektep desek, mekteptiń basty tulǵasy, júregi – muǵalim. Jahandaný zamanynda ulttyq básekege qabiletti bolýdyń kórsetkishi bilim deńgeıimen ólshenedi. Sondyqtan álemdik bilim keńistigine kirigip, bilim berý júıesin halyqaralyq bıikke kóterý – kezek kúttirmeıtin ózekti másele. Bul máseleni sheshýdiń kilti – ustazdardyń qolynda», deıdi Baǵdar Naǵymova.
«Ustaz bolý – óz ýaqytyńdy aıamaý, ózgeniń ýaqytyn aıalaý» dep fransýz oıshyly Jan Jak Rýsso aıtpaqshy, ustazdardyń eńbegi eren ekeni daýsyz. Dúnıedegi mamandyq ataýlynyń tóresi – ustazdyq. Ásili, muǵalim barlyq mamandyq ıesin tárbıeleıtin, oqytyp úıretetin jan. «Muǵalim mamandyǵy – barlyq mamandyqtyń anasy» demekshi, ustaz aldynan tárbıe almaıtyn jan joq. Ustaz bergen tárbıe árbir jannyń ómirine jol silter shamshyraq sekildi.
Gúlsaıra MUQANOVA,
pedagog-zertteýshi
Batys Qazaqstan oblysy
