HH ǵasyr ádebıetiniń klassıgi Sábıt Muqanov, Alash arystary Smaǵul Sádýaqasuly, Qoshke Kemeńgeruly, Ábdirahman Aısarın, aqyn-jazýshylar Dıhan Ábilev, Jaqan Syzdyqov, Shahmet Qusaıynov, Ǵalym Maldybaev, Safýan Shaımerdenov sııaqty marǵasqalardyń da qoltańbasy qalǵan.
Ǵasyrlyq mereıtoı budan bes jyl buryn atalmaq edi, biraq sol jyldardaǵy halyqty bir ýys qylǵan indet toı jasaýǵa múmkindik bermedi. Odan ári tórt jylda úsh ákim aýysyp, áıteýir atap ótý keıinge qala bergen. Endi, mine, 105 jyl tolǵanda súıikti gazetimizdiń ǵasyrlyq toıyn respýblıkalyq deńgeıdegi «Maǵjannan bastalǵan jol» atty ǵylymı-praktıkalyq konferensııa túrinde atalyp ótti.
Esesine, bul toıda Prezıdenttiń, Senat pen Májilistiń atynan quttyqtaýlar keldi. Prezıdenttiń keńesshisi Málik Otarbaev Memleket basshysynyń quttyqtaýyn oqyp, gazettiń qazirgi basshysy Erbaqyt Amantaıdyń ıyǵyna shapan japty. Al basylymnyń baıyrǵy qyzmetkeri Zarap Qusaıynov pen bas redaktor Nurgúl Oqashevaǵa «Qurmet» ordenin tapsyrdy. Jaýapty hatshy Jadyra Qanafına «Eren eńbegi úshin» medalimen, al gazettiń kópjyldyq redaktory Jarasbaı Súleımenov Alǵyshatpen marapattaldy.
Oblys ákimi Ǵaýez Nurmuhambetovtiń syılyǵy da az bolǵan joq. Ekonomıkasy qaryshtap, damyp kele jatqan oblys rýhanı-mádenı salaǵa degen qamqorlyǵyn aıamaýǵa tıisti deı kelip ákim gazet redaksııasyna sý jańa avtokóliktiń kiltin tabystady. 18 jyl boıy jóndeý kórmegen gazet ǵımaratyn kúrdeli jóndeýge qarajat bólinetinin aıtty. Sonymen birge ol oblys ákiminiń Qurmet gramotasymen gazettiń baıyrǵy qyzmetkerleri Nursaıyn Shárip pen О́mir Esqalıdi marapattap, ıyqtaryna shapan japty. Basqa da birneshe qyzmetkerge Alǵyshat tapsyrdy.
«Maǵjannan bastalǵan jol» ǵylymı-praktıkalyq konferensııasynda L.N.Gýmılev atyndaǵy EUÝ professory Saǵymbaı Jumaǵul «Alash baspasózi jáne «Bostandyq týy» gazetinde jarııalanǵan Maǵjan shyǵarmalary» , «Maǵjan ortalyǵynyń» dırektory Jarasbaı Súleımenov «Maǵjan jáne ulttyq basylym», eks-senator Jabal Erǵalıev «Aımaqtyq gazetter: keshe, búgin, erteń», L.N.Gýmılev atyndaǵy EUÝ professory Qaıyrbek Kemeńger «Qoshke Kemeńgerulynyń qyzyljarlyq kezeńi», M.Qozybaev atyndaǵy SQÝ professory Janar Talaspaeva «Soltústik Qazaqstan» gazetiniń qazirgi kelbeti: dástúr men jańashyldyq sabaqtastyǵy» degen taqyryptarda baıandama jasady. «Qazaq gazetteri» JShS basshysy D.Qamzabekulynyń atynan «Kazahstanskaıa pravda» respýblıkalyq gazetiniń bas redaktory Sábıt Maldybaev, «Bas redaktorlar klýby» men Jýrnalıster akademııasynyń atynan quttyqtaýdy Erjan Qalymbaıuly jetkizdi.
«О́ńirimizdiń shynaıy shejiresi bolyp tabylatyn gazetimizdi alǵash jaryq kórgen kúnnen bastap ulttyq rýhymyzdy asqaqtatyp otyrǵan, baǵy janǵan, baqytty qara shańyraq dep sanaımyz. Sebebi gazet tarıhyn sóz etkende, osy basylymda eńbek etken kórnekti tulǵalardy aıryqsha atap ótken jón», dedi óziniń baıandamasynda Janar Talaspaeva.
«Soltústik Qazaqstan» gazetin uzaq jyldar basqarǵan redaktorlardyń arasynda Ýáp Rahymjanovtyń, Baqyt Mustafınniń, Káribaı Musyrmannyń, Jarasbaı Súleımenovtiń esimderi halyqtyń jadynda. Ári ekonomıkalyq daǵdarys, ári demokratııalyq jańǵyrý jyldarynda gazet tizginin ustaǵan Baqyt Mustafınniń erligi umytylmaıdy. Osy jyldarda gazettiń shyǵarmashylyq kelbetin aıqyndap, ádebı-rýhanı ortasynyń qalyptasýyna Bolat Qojahmetov, Málik Muqanov, Toqtar Zikirın, Ásker Ábilqaıyrov, Zeınolla Ákimjanov, Nursaıyn Shárip, Murat Nurmuqanov, Shashýbaı Maldybaev, Zarap Qusaıynov, Qurman Ramazanov, О́mir Esqalı, Qoshan Qalı syndy qalamgerler eleýli úles qosty. Olardyń árqaısysynyń qoltańbasy gazette erekshe kórinip, oqyrmandar talqylap jatatyn edi. Aǵa býyn qalyptastyrǵan ónegeli joldy Nurgúl Oqasheva, Araılym Beısenbaeva, Dıas Aıaǵan, Samrat Quskenov, Jadyra Qanafına, Aqmaral Esdaýletova sekildi alǵyr da izdenimpaz jas jýrnalıster laıyqty jalǵastyryp, basylymnyń bedeli men mazmundyq deńgeıin jańa beleske kóterip otyr. Gazettiń qazirgi damýy onyń redaktory, jýrnalıst Erbaqyt Amantaıdyń esimimen tyǵyz baılanysty. Ol redaksııa jumysyna tyń serpin berip, basylym mazmunyn jańǵyrtýǵa, qoǵamdaǵy ózekti máselelerdi kóteretin saraptamalyq pýblısıstıkany damytýǵa aıryqsha kóńil bólip keledi.
Bir jyldary sýyrylǵan sheshen, qarasózden qaımaq aıyratyn Jabal Erǵalıev aǵamyz úlken minberlerdiń birinen: «Qazir qazaqsha gazetterdi eshkim oqymaıdy, sondyqtan ol taralmaıdy» delinetin sózderge el gazeti «Egemen» qaqyrata soqqy berip, tırajyn 200 myń danaǵa jetkizip, ulttyq namysty qorǵap qaldy», degen edi. Sol sózderdi búgin «Soltústik Qazaqstan» gazetine qarata aıtýǵa bolady. Basylym keıingi birneshe jyldan beri oblystyq gazetter arasynda taralymyn túsirmeı, 9 myń dananyń tóńireginde ustap keledi. Bul, árıne, gazet sapasynyń joǵarylyǵy, sonymen birge utymdy uıymdastyrýshylyqtyń arqasy.
Oblys shejiresiniń aldaǵy ǵasyrlarda ómirli bolyp, elmen birge máńgilik jasaǵanyn tileımiz.
Soltústik Qazaqstan oblysy
