Jańadan saılanǵan depýtattardy Astana ákimi Jeńis Qasymbek quttyqtady.
«Elorda máslıhaty depýtattarynyń aldynda úlken jaýapkershilik tur. Astanada 1 mıllıon 300 myńnan astam adam turady. Qalada sý tapshylyǵy baıqalady, taǵy da basqa qordalanǵan máseleler bar. Aldaǵy ýaqytta solardy birlesip sheshemiz degen nıettemin. Turǵyndardyń sany ósken saıyn qalada balabaqsha men mektep jetispeýshiligi baıqalady. Qala turǵyndarynyń senimin aqtaý kerek. Memleket basshysy birqatar mindetter júktedi, sol tapsyrmalardy ortaq oryndaýda bizdiń de qosatyn úlesimiz zor», dedi ákim.
Ári qaraı depýtattar sessııanyń kún tártibin qarastyrýǵa kiristi. Máslıhatshylar turaqty komıssııalardyń quramy men olardyń tóraǵalaryn taǵaıyndady.
Azamat Aıtqojın Zańdylyq, quqyqtyq tártip jáne jurtshylyqpen jumys máseleleri jónindegi komıssııanyń tóraǵasy bolsa, Bıýdjet, ekonomıka, ónerkásip jáne kásipkerlik máseleleri jónindegi komıssııanyń tóraǵasy bolyp Kendebaı Adambekov saılandy. Qurylys, ekologııa, kólik, saýda jáne TKSh máseleleri jónindegi komıssııaǵa Vladıslav Sergeev, al Áleýmettik-mádenı damý máseleleri jónindegi komıssııaǵa Asqar Smaǵulov tóraǵalyq etedi. Sondaı-aq Berik Jákenov Amanat partııasy fraksııasynyń jetekshisi bolyp saılandy.
Elorda máslıhatynyń quramynda 34 depýtat, Amanat partııasynda 12 mandat, QHP partııasynda jáne Baytaq qazaqstandyq jasyldar partııasynda bir mandat jáne «Aq jol» partııasynda úsh mandat bar. Taǵy 17 depýtat bir mandatty saılaý okrýgteri boıynsha saılandy. Jańa máslıhat quramynda 25 er adam jáne 9 áıel bar. Eń jas depýtat – 22 jasta, eń úlkeni – 63 jasta. Depýtattardyń ortasha jasy – 46 jas.
