1-17 sáýir aralyǵynda Turan Eýropada birneshe konsert ótkizedi. Atap aıtqanda, ansambl Fransııadaǵy Parıj, Lıon jáne Belforǵa, Shveısarııada Jenevaǵa, Belgııa astanasy Brıýsselge, Horvatııanyń Zagrebine, Slovenııanyń Lıýblıana qalasyna, Býdapesht pen Venaǵa barady.
Aıta keteıik, gastrolder AQSh astanasy - Vashıngtonda bastaldy. Naýryz meıramy aıasynda 21-23 naýryz aralyǵynda ujym Kolýmbııa okrýgi ýnıversıtetinde jáne Djordj Vashıngton ýnıversıtetiniń sahnasynda óner kórsetti.
Týrne aıasynda sahnaǵa Roza Baǵlanova atyndaǵy «Qazaqkonserttiń» basqa da solısteri shyǵady: kompozıtor, Qazaqstannyń eńbek sińirgen qaıratkeri, «Qazaqkonserttiń» dırektory Aqtoty Raıymqulova, ataqty tenor jáne Qazaqstannyń eńbek sińirgen qaıratkeri Medet Shotabaev pen vıolonchelıst, Shanhaı konservatorııasynyń magıstranty Talǵar Shalqaruly. Ári qaraı ansambl Qyrǵyzstan men О́zbekstanǵa barady.
«Osy 15 jyl ishinde Turan AQSh-ta jáne basqa elderde birneshe ret óner kórsetti. Ansambl buǵan deıin Nıý-Iork, Los-Andjeles, San-Fransısko jáne Vashıngtondaǵy Karnegı holl jáne Kennedı ortalyǵy sııaqty oryndarda konsertter bergen. Ansambl elimizdiń ejelgi mýzykalyq ónerin, kóne aspaptardyń dybysyn qaıta jańǵyrtty. Bul rette, ol búkil álemdegi san myńdaǵan tyńdaýshylardyń qurmetine ıe boldy, bul sheteldikterdiń ujymǵa degen qyzyǵýshylyǵynyń dáleli», dep atap ótti QR MSM Mádenıet komıteti tóraǵasynyń orynbasary Danııar Álıev.
