Qoǵam • 31 Naýryz, 2023

UQK Soltústik Qazaqstanda separatızmdi nasıhattaý baby boıynsha tintý júrgizýde

200 ret kórsetildi

UQK departamenti Soltústik Qazaqstan oblysyndaǵy «Jumysshylardyń halyq keńesi» músheleriniń Qazaqstandy qabyldamaý jáne Qazaq KSR-ge oralý týraly málimdemesinen keıin tergeý bastady, dep habarlaıdy Egemen.kz Bas prokýratýranyń baspasóz qyzmetine silteme jasap.

«2023 jylǵy 30 naýryzda Soltústik Qazaqstan oblysy boıynsha Ulttyq qaýipsizdik komıteti departamenti áleýmettik jelilerde «Petropavl qalasy jumysshylarynyń halyq keńesi» qurylǵany jónindegi beınerolıkti ornalastyrý deregi boıynsha Qylmystyq kodekstiń 180-baby 2-bóligi boıynsha (BAQ paıdalana otyryp adamdar tobymen separatızmdi nasıhattaý) sotaldy tergep-tekserý bastady», delingen habarlamada.

Osy kúni oblystyq Polısııa departamenti men Ulttyq qaýipsizdik komıteti departamentiniń tergeýshilerinen jedel-tergeý toby qurylǵan.

«Is boıynsha prosess prokýrorlary aıqyndaldy. Sotaldy tergep-tekserý sheńberinde jedel-tergeý is-sharalary, onyń ishinde tintý men alý júrgizilip jatyr, sondaı-aq tıisti sot saraptamalary taǵaıyndaldy»,  delingen habarlamada.

Qylmystyq-prosestik kodekstiń 201-babyna sáıkes ózge derekter jarııalanbaıdy. Tergeý barysy Bas prokýratýranyń baqylaýynda.

Buǵan deıin áleýmettik jelilerde keıbir «belsendiler» Qazaq KSR-niń 1937 jylǵy Konstıtýsııasy negizinde «Jumysshylardyń halyq keńesi» qurylǵanyn jarııalaǵany týraly vıdeolar men habarlamalar paıda boldy. Sonymen qatar vıdeoda jınalǵandar Qazaqstan Respýblıkasyn «korporasııa» dep atap, túrli qastandyq teorııalaryn alǵa tartady.

Uqsas jańalyqtar