Kern dep otyrǵanymyz – geologııalyq barlaý barysynda jer qoınaýynan burǵylanyp alynatyn jerasty jynysynyń synamasy. Geobarlaýshylar jer qoınaýynda qandaı paıdaly qazbalar bar ekenin, onyń qaı tereńdikte jatqanyn osy kernniń ár metrin zertteý arqyly tanyp, biledi. Jýandyǵy bilekteı, uzyndyǵy 200 metrden 800 metrge deıin baratyn bul qatty materıaldardy geolog-mamandar osy jańa ǵana ashylǵan keshende kesip, birinshi jartysyn zerthanaǵa jiberedi de, ekinshisin kern qoımasyna saqtaýǵa qoıady.
Memleket basshysy Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty Joldaýynda elimizdiń resýrstyq áleýeti tolyq ashylmaǵanyn, geologııalyq turǵydan zerdelený deńgeıi tómen ekenin tilge tıek ete kelip, jer qoınaýyn paıdalaný salasyna, ásirese geologııalyq barlaý jáne jer qoınaýyn keshendi zertteý isine tyń serpin qajet ekenin eskertken edi. Prezıdent, sondaı-aq, geologııalyq aqparattyń ashyq sıfrlyq málimetter bazasyn qurýdy qadap tapsyrǵan bolatyn. Rýdnyıda ashylǵan kern qoımasy – Joldaýda júktelgen mindetterdi júzege asyrý barysynda qol jetken mańyzdy mejeniń biri. Bul jóninde saltanatty jıynda kenshiler qaýymyn quttyqtaǵan Geologııa komıtetiniń tóraǵasy keńirek baıandap ótip, ERG GeoHub-tyń ashylýyn – otandyq geologııa men geologııalyq barlaý salasy úshin úlken tarıhı oqıǵa dep baǵalady.
– Búginde elimizde geologııa salasynyń ınfraqurylymyn damytýǵa baǵyttalǵan aýqymdy jumystar qolǵa alynyp jatyr. Geologııa salasynyń tujyrymdamasy qabyldandy. Onyń tórt baǵyty bar. Sonyń biri – osy geologııalyq ınfraqurylymdy damytý. Bul keshenniń elimizge de, kompanııaǵa da bereri kóp, – dedi Erlan Aqbarov.
Jańa tehnologııamen jabdyqtalǵan ERG GeoHub kesheninde 100 myń metr kern saqtalatyn bolady. Jańa habtyń Qazaqstandaǵy ózge kern qoımalarynan ereksheligi munda jer qoınaýyndaǵy qazba baılyqtar týraly avtomattandyrylǵan derekter qory túziledi.
ERG kompanııasynyń geologııalyq barlaý qyzmetin damytýǵa arnalǵan aýqymdy baǵdarlamasy aıasynda Qostanaı jáne Aqtóbe oblystarynda dál osyndaı taǵy birneshe kern qoımasyn salý kózdelgen.
Qostanaı oblysy
