Qosymsha bilim berý ordasy az ýaqyttyń ishinde tamyry tereńge boılaıtyn tarıhtyń negizin qalap úlgerdi. Bilim mekemesiniń negizgi maqsaty – sanaly, bilimdi, kózi ashyq urpaq tárbıelep, elimizdiń bedelin asqaqtatatyn ult qalyptastyrý. Úsh jyldyń ishinde óńirdegi bilim men tárbıeniń oshaǵyna aınalǵan «Bolashaq Saraiy»-ynda qazirgi tańda sport, medıa, shyǵarmashylyq, ǵylymı-ıntellektýaldyq, IT baǵyttary boıynsha 3 myńnan astam bala 120 túrli úıirmede óz tańdaýy arqyly bilim-qabiletterin jetildirý ústinde.
Shyǵarmashylyq baǵytta oqýshylar men stýdentter «Gúlder», «Bolashaq», «Tumar», «Diamond» toptarynda bı ónerin, «Úlgili vokal» úıirmesinde án aıtýdy, «Fantazııa» jáne «Ekspressııa» toptarynda sýret salýdy, «Fom-florıstıka», «Zolotaıa nıt» sándik-qoldanbaly óner úıirmelerinde túrli buıym jasaýdy, «Úkili dombyra», «Jetigen», «Qylqobyz», «Sazsyrnaı» úıirmelerinde aspaptarda oınaýdy, «Maska» úıirmesinde sahna ónerin meńgerýdi, «Mobılografııa» úıirmesinde foto men beınebaıandar túsirýdi, «Júrgizýshiler klýbynda» kólik júrgizýdi úırenedi. Ǵylymı-ıntellektýaldy baǵytta «Jas ǵalym», «Jas natýralıst», «Hımııanyń shaǵyn akademııasy», «Green industry», «Eco – water», «Planta Tech» jáne taǵy basqa úıirmelerde bıotehnologııa, ekologııa, qorshaǵan ortany qorǵaýǵa baılanysty taqyryptar zerttelip, zamanaýı zerthanada Germanııa, Shvesııa elderinen ákelingen qurylǵylar arqyly teorııany tájirıbe júzinde synap kórýge múmkindik bar.
Qazirgi sıfrlyq dáýir kezeńinde aqparattyq-kommýnıkasııalyq tehnologııalar men ınjenerlik tehnıkalyq baǵytta bolashaq mamandardy daıarlaý júzege asyrylyp, «Cybertron», «Lego Mindstorms», «Lego Club», «Lego WeDo», «Tesla club», «Lego kids», «Lego junior» úıirmelerinde robottehnıka, «New generation», «Radıotehnıkter klýby», «STEAM», «STEAM IOT» úıirmelerinde energetıka, elektronıka, avtomattandyrý, «3D prototıpteý stýdııasy» úıirmesinde 3D modelderdi jasaý, shyǵarý jáne óńdeý, «Grafıkalyq dızaın», «Kompıýterlik dızaın», «WEB dızaın», «Illıýstrator» úıirmelerinde grafıkalyq sýretterdi salý, anımasııalardy jasaý, «Python», «Java Script», «Algorıtmder», «Kıberqaýipsizdik negizderi» úıirmelerinde baǵdarlamalaý tilderi, kıberqaýipsizdik negizderi úıretiledi. О́zektiligimen erekshe medıabaǵyttaǵy «Jýrnalıstıka negizderi» úıirmesinde jas jýrnalıster, «Kóshbasshylar mektebinde» jas kóshbasshylar, «Pikirsaıys» úıirmesinde sóz sheberleri, «Aqmolataný», «Mádenı-tanymdyq týrızm» úıirmelerinde ólketanýshylar bilim alyp, bolashaq fototilshiler men beıneoperatorlar óz qabiletterin «Foton» úıirmesinde jetildire alady.
Deni saý urpaq qalyptastyrý úshin keremet sporttyq alań uıymdastyrylǵan. Munda sporttyń negizgi túrleri úıretiledi. Oqýshylar dop oıyndarymen, kúres túrlerimen, karate, dzıýdo, tennıs, shahmat, qazaqtyń ulttyq oıyndary asyq, toǵyzqumalaq, qazaqsha kúrespen aınalysyp, sýda júzý úıirmesine barady. Sonymen qatar erekshe bilimdi qajet etetin balalar úshin psıhologııalyq-pedagogıkalyq qyzmet kórsetiledi. Munda 118 bala bilim alady. Balalar ózderin erkin sezinedi. О́ıtkeni tolyqqandy bilim alýǵa barlyq jaǵdaı qarastyrylǵan jáne erekshe balalarmen logoped, defektolog, psıholog, art-terapevt mamandary jumys isteıdi.
Bilim ordasyn tańdap, qyzyǵýshylyqtaryn qanaǵattandyrý maqsatynda úıirmege qatysatyn balalar sany jyl saıyn kóbeıip keledi. «Volashaq saraiy» talantty da daryndy balalardy tárbıeleýge aıryqsha úles qosyp otyr. Maqtanýǵa turarlyq jetistikteri de mol. Atap aıtqanda, «Sheber qoldar» úıirmesiniń oqýshysy Temir Inaıat «Altyn qazyna» atty oblystyq konkýrsta birinshi oryn ıelendi. Shı toqý tehnıkasymen jasalǵan «Qobyz úni» atalatyn týyndysymen tamsandyrǵan jas jeńimpaz respýblıkalyq konkýrska joldama aldy. Rýmynııada ótken asyq atý, bes asyq jarysynan «Asyq atý» úıirmesiniń tárbıelenýshisi Aılana Dýman birinshi oryndy ıelenip, Álem kýbogin jeńip aldy. Atalǵan jarysqa Qyrǵyzstan, Túrkııa, Chehııa, Moldova, Bolgarııa memleketterinen 32 sportshy qatysqan.
Ǵylymı-zııatkerlik, IT baǵyttary boıynsha da kóptegen jetistik bar. Máselen, ınnovasııalyq ıdeıalardyń oblystyq baıqaýynda Andreı Býtorın birinshi oryndy ıelendi. Qaraǵandy qalasynda ótken «Roboland 2022» halyqaralyq robottehnıka jarysynda Arman Maqyshev, Andreı Býtorın jeńimpaz atandy. Oqýshylar men stýdentter jáne jas ǵalymdar arasynda «Aqmola POWER» ınnovasııalyq ıdeıalar men jobalardyń aımaqtyq baıqaýynda Álı Rústemuly, Talǵat Maqsat, Qaırat Erasyl ózderiniń tyń ıdeıalarymen aldyńǵy qatarǵa shyǵyp, birinshi oryn aldy. Dúbirli dodalarda alǵyrlyqtarymen alǵa sýyrylyp, oza shabatyn oqýshylardyń ár jeńisi – tálimgerler men jetekshiler eńbeginiń jemisi.
«Volashaq saraiy»-nyń basshysy Aınagúl Qydyrbaıqyzynyń aıtýynsha, úsh jyldyń ishinde mundaı tolaıym belesti baǵyndyrý – ortaq jumystyń arqasy. «El bolashaǵy – bilimdi jastar. Árbir memlekettiń bolashaǵy mektebinde shyńdalady. Mekememizde ár oqýshynyń bilim-qabiletteri men talantyn shyńdaýǵa úlken mán beriledi. Bolamyn degen balany qoldap, jol kórsetip, múmkindik syılaý – «Volashaq saraiy»-nyń basty maqsaty. Biz birigip asýlar men shyńdardy baǵyndyramyz», deıdi ol.
Zamanaýı tehnıkamen jabdyqtalǵan ǵımaratta tyń ıdeıalardy júzege asyrýǵa múmkindik mol. Ekojobalar sheberhanasynyń jetekshisi, tehnıka ǵylymdarynyń magıstri Tımýr Kamalov áleýmettik mańyzy zor, erekshe balalardy qoǵamǵa beıimdeýge jáne olardy tolyqqandy ómirge uıymdastyrý maqsatynda qaıta óńdelgen plastıkten balaǵa qol protezin jasady. Árıne, bul jobaǵa «Recycling club» úıirmesiniń bilim alýshylary da atsalysty.
«Bilimdi bolý degen sóz – belgisiz nárseni ashý, qabiletine ıe bolý degen sóz», dep álemniń ekinshi ustazy Ábý Nasyr ál-Farabı aıtqandaı, bizdiń bilim berý qyzmetkerleriniń negizgi maqsaty – daıyn bilimdi meńgergen oqýshylardy oqytyp qoımaı, ómirge beıim, óz aınalasynda belgisiz qalǵan ár jaǵdaıdan jańalyq ashýǵa jany qumar jańashyl, jan-jaqty, damyǵan tulǵalardy qalyptastyrý. Balalardyń bilimi men jyl boıy jetken jetistikterin baǵalap, jyldy qorytyndylaıtyn jáne alǵa jigerlendiretin erekshe is-shara «Bolashaq premııasy» dep atalady. Erekshelikterine qaraı ár balanyń darynyn baǵalaıtyn dástúrli sharany bilim alýshylar taǵatsyzdana kútedi.
«Volashaq saraiy» qyzmetkerleri arasynda da sport jarystaryn ótkizý dástúrge aınalǵan. Jal saıyn Naýryz merekesine oraı «Bolashaq barysy» atty qazaq kúresinen jarys uıymdastyrylady. Jetistikke toly jyldyń taǵy bir jemisi – oqýshylardyń «Caravan of Knowledge» qorynyń «Steam teen Research» respýblıkalyq granttyq baǵdarlamasyna qatysyp, 5 grant utyp alýy. IT jáne ǵylymı-ıntellektýaldy baǵyttyń bilim alýshylary óz jobalarymen dodaǵa túsip, qorǵap shyqty. Jobalaryn júzege asyrý jolynda 125 myń teńge aqshalaı grant ıegerleri atandy. Shyǵarmashylyq bóliminiń «Volashaq» bı úıirmesiniń oqýshylary О́zbekstanda ótken «Nauryz fest» halyqaralyq konkýrsynda Gran-prıge ıe bolǵanyn da aıta keteıik.
Ár oqý jyly dástúrli shara – shyǵarmashylyq bólimniń oqýshylary uıymdastyrǵan esep berý konsertimen qorytyndylanady. Ata-analar úshin balalarynyń jetistigi men eńbeginiń jemisin kórýden asqan qýanysh joq.
KО́KShETAÝ
