– Búginde «Teńizshevroıl» jetekshi halyqaralyq kompanııa retinde elimizdiń jalpy ekonomıkalyq damýyna tabysty úles qosyp keledi. Elimizde óndiriletin munaıdyń úshten biri «Teńizshevroılǵa» tıesili. Kompanııa otyz jyl ishinde 70 mıllıard dollar ınvestısııa quıyp, memleket bıýdjetine 160 mıllıard dollardan astam kiris ákeldi. Kompanııa taýarlar men qyzmetterdiń 70 paıyzyn jergilikti ónim jetkizýshilerden satyp alady. «Teńizshevroıl» jumysshylarynyń 95 paıyzdan astamy – Qazaqstan azamattary, – dedi Prezıdent.
Memleket basshysynyń aıtýynsha, kompanııa munaı salasynda ozyq tehnologııalardy belsendi túrde qoldanyp, kómirsýtegi beıtaraptyǵyna qol jetkizýge septigin tıgizetin sharalardy dáıekti túrde qabyldap jatyr.
– 2000 jyldan beri kompanııa aýaǵa taralatyn shyǵaryndylardyń kólemin 75 paıyzǵa azaıtty. Bul baǵyttaǵy jumys jalǵasýǵa tıis. Teńiz ken ornyndaǵy óndiristi aýqymdy túrde keńeıtý jobalarynyń júzege asyrylýy aıaqtalyp keledi. Bul elimizge munaı óndirisiniń kólemin taǵy da 12 mıllıon tonnaǵa arttyryp, álemdegi eń iri munaı jetkizýshi elderdiń qataryna kirýge múmkindik beredi, – dedi Prezıdent.
Memleket basshysy jańa shaqyrylymdaǵy Parlamenttiń birinshi sessııasynda sóılegen sózinde shaǵyn jáne orta bıznesti damytý máselesine basa nazar aýdarǵanyn atap ótti. Onyń pikirinshe, «Teńizshevroıl» bul baǵytta da mańyzdy ról atqarady. Kompanııanyń aýqymdy óndiristik qýatynyń arqasynda ártúrli salada júzdegen jańa kásiporynnyń paıda bolýyna ekonomıkalyq negiz qalandy. Sonyń nátıjesinde on myńdaǵan jumys orny ashyldy.
Budan bólek, Prezıdent «Teńizshevroıldyń» áleýmettik jaýapkershiligi týraly aıtty. Kásiporyn otyz jylda 100-den astam iri áleýmettik jobany iske asyrǵan. Atap aıtqanda, mektepter, balabaqshalar, aýrýhanalar men basqa da nysandardyń qurylysyna qomaqty qarjy bólgen.
Jıyn sońynda Prezıdent otandyq munaı salasyna sińirgen erekshe eńbegi úshin birqatar eńbek ardageri men kompanııa qyzmetkerlerin memlekettik nagradalarmen marapattady.
«Qurmet» ordenimen eńbek ardagerleri Januzaq Orazov, Jeńis Seıtaev, Kóbentaı Súıesinov, III dárejeli «Eńbek Dańqy» ordenimen eńbek ardagerleri Muhıt Ábilǵazıev, Myrzaqýat Qarabalın, Leonıd Toropkın, Aıtqalı Uıpaqov, «Eren eńbegi úshin» medalimen «Teńizshevroıl» JShS ekinshi býyndaǵy zaýytynyń basqarýshysy Danııar Bıjanov, eńbek ardagerleri Bolat Ernııazov, Orynbaı Jákıev, «Teńizshevroıl» JShS biriktirilgen óndiristi basqarý ortalyǵynyń basshysy Rýslan Inebaev, Qazaqstan Respýblıkasy Prezıdentiniń Qurmet gramotasymen «Teńizshevroıl» zaýytynyń basshysy Nurlan Bektaev nagradtaldy.
