Qoǵam • 05 Sáýir, 2023

Kúıeýiniń burynǵy áıelin óltirgen elordalyq 1,5 jylǵa sottaldy

573 ret

kórsetildi

2 mın

oqý úshin

Janjal kezinde kúıeýiniń burynǵy azamattyq áıelin óltirgen Astana turǵyny bir jarym jylǵa sottaldy, dep habarlaıdy Egemen.kz Almaty aýdanynyń № 2 aýdandyq sotyna silteme jasap.

Gúlshahra SANSYZBAI

Kúıeýiniń burynǵy áıelin óltirgen elordalyq 1,5 jylǵa sottaldy

Búgin, 5 sáýirde aıyptalýshyǵa qatysty Qylmystyq kodekstiń 101-baby, 1-bóligi (affekt jaǵdaıynda adam óltirý) deregi boıynsha sot úkimi shyqty.

Sot málimetinshe, marqum M. aıyptalýshy R.-nyń kúıeýimen resmı nekege turǵanǵa deıin qarym-qatynasta bolǵan, olardyń ortaq balasy bar. R.-nyń kúıeýi zańdy túrde úılengennen keıin de jábirlenýshi M.-men qarym-qatynasyn jalǵastyrǵan. Bul R.-nyń uıaly telefonyna jiberilgen fotolar men namysyna tıetin sózder jazylǵan hattarmen dáleldengen.

«R. jábirlenýshiniń júıeli túrde qorlaýy saldarynan emosıonaldyq qozý (affekt) jaǵdaıynda jábirlenýshiniń aýlasyna barǵanda aýyzsha janjal týyndaǵan, janjal kezinde R. jábirlenýshiniń ómirlik mańyzy bar múshesine pyshaq suǵyp alǵan. Sonyń saldarynan jábirlenýshi alǵan dene jaraqatynan aýrýhanada kóz jumdy», dedi sot.

Sotta isti qaraý barysynda taraptar tatýlasý týraly medıasııalyq kelisimge qol jetkizgen.

«Osyndaı jaǵdaıda sottyń Qylmystyq is júrgizý kodeksiniń 340-babynyń 1-bóligine sáıkes sottalýshynyń jaǵdaıyn nasharlatýǵa quqyǵy joq, sotta prokýror R.-ǵa 1 jyl 6 aı merzimge bas bostandyǵynan shekteý jazasyn surady. Sottalýshynyń kinási R.-nyń óziniń, kýágerlerdiń aıǵaqtarymen, oqıǵa ornynan túsirilgen beınejazbamen, saraptama qorytyndylarymen dáleldendi», dep túsindirdi sot.

Nátıjesinde, sýdıa R.-nyń qylmysyn ortasha aýyr dárejede baǵalap, sottalýshynyń bir jasar balasy bar ekenin jáne onyń jasaǵan áreketine ókinýin jeńildetetin mán-jaılar dep eskerip, 1 jyl 6 aıǵa bas bostandyǵyn shekteý jazasyn taǵaıyndady.

Úkim zańdy kúshine engen joq.