Jıynǵa naıb múftıler, Bas múftı keńesshileri, Dinı basqarmanyń bólim meńgerýshileri men mamandary sondaı-aq onlaın rejımde oblys, respýblıkalyq mańyzy bar qalalardyń bas ımamdary qatysty.
«Kózdi ashyp-jumǵansha Ramazan aıynyń alǵashqy on kúni ótti. Alla Taǵalanyń meıiriminen úmit etip, Haqqa da, halyqqa da qyzmet etip jatqan ımamdarymyzǵa, barsha din qyzmetkerine alǵysymdy bildiremin. Jabbar Iemiz isimizge jeńildik pen bereke berip, Ramazan aıynan rýhanı azyqtanyp shyǵýdy barshamyzǵa násip etsin. Saýaptar eselenip jazylatyn oraza ýaqytynda josparlaǵan ıgi isterimizdi oıdaǵydaı atqaryp shyǵýǵa tilektespin», dedi QMDB Tóraǵasy.
Jıyn barysynda bólim meńgerýshileri baıandama jasap, alǵashqy on kúnde atqarylǵan jumystar jaıly sóz qozǵady. Máselen, elimizdiń 697 meshitinde kúndelikti 101 170 adamǵa aýyzashar berilse, 640 meshittegi taraýyq namazynda Quran hatym oqylýda.
Kúndelikti taraýyq namazynan buryn «Quran aıattarynyń hıkmeti» taqyrybynda jamaǵatqa ýaǵyz aıtylyp jatyr. Sondaı-aq 934 meshitte «Namaz oqyp úıreneıik» jáne «1 aıda Quranǵa tús» dáristeri Ramazan aıy boıy júrgizilmek.
Aıta ketsek, «El úlesi – páterge» jobasy aıasynda 2 din qyzmetkerine jáne 8 kópbalaly otbasyǵa, barlyǵy 10 baspananyń kilti tabystaldy.
Sondaı-aq «Ramazan táttisi» jobasy barysynda 4 089 balaǵa táttiler men oıynshyqtar taratyldy.
