Skandınavııa túbeginde Qazaq eliniń namysyn myna dopty hokkeıshiler qorǵady: Qaqpashylar – Vıacheslav Gorchakov pen Berjan Ahmetjanov. Alańdaǵy oıynshylar – Elaman Álipqalıev, Ershat Amangeldıev, Nurbol Bókeshov, Petr Grıbanov, Denıs Maksımenko, Bolat Muhıt, Dáýren Oralov, Anton Sveshnıkov, Eskendir Nuǵmanov, Nıkıta Iаrov, Samat Amanshın, Raýan Isalıev, Qýanysh Temiralın, Sultan Qadyrjanov, Evgenıı Medvedev jáne Maksım Ýtebalıev.
Qazaqstannyń dopty hokkeıshileri tusaýkeser kezdesýin Sýomı eliniń ókilderimen ótkizdi. Kezinde osy komandamen terezesi teń oınaýshy edik. Biraq sońǵy jyldary olar qatty kúsheıgen eken. Al biz bolsaq, kerisinshe, keri ketip baramyz. Báseke bastalǵan bette tizgindi myqtap qolǵa alǵan fınder qaqpamyzǵa úsh dop soqty. Bul goldardyń avtorlary – Djımmı Heınonen, Iаaoko Hıvonen jáne Emıl Fedorov. 37-mınýtta Samat Amanshınniń ádemi pasynan keıin Raýan Isalıev nysanany dál kózdedi. Sol kezde keýdemizde úmit oty mazdaǵan edi. Biraq qaıta qaharyna mingen Fınlıandııa quramasy taǵy bes dopty qaqpamyzǵa toǵytty. Esep – 8:1.
Qazaqstan quramasy kelesi kezdesýin AQSh sportshylarymen ótkizdi. Bul básekede jerlesterimiz aıqyn basymdyq tanytty. Bizdiń jigitter arasynan Raýan Isalıev, Qýanysh Temiralın jáne Maksım Ýtebalıev dýblderdiń avtory atansa, taǵy bir goldy Petr Grıbanov soqty. Amerıkalyqtardyń eki doppen ǵana jaýap qaıyrýǵa kúshteri jetti – 7:2.
Úshinshi týrdaǵy qarsylasymyz Norvegııa boldy. Ádette bul komandany esh qınalmaı utatyn edik. Biraq bul joly oısyraı jeńildik. Skandınavııalyq bendıshiler qaqpamyzǵa alty gol soqsa, bizdiń jigitter bir ret qana mergendik tanytty – 6:1. Raýan Isalıev uıymdastyrǵan jyldam shabýyldy Denıs Maksımenko sátti aıaqtady. Toptyq týrnırdiń sońǵy saıysyndaǵy qarsylastarymyz Shvesııa edi. Jarys qojaıyndary qaqpamyzǵa jaýapsyz 12 dop saldy – 12:0. Qazaqstan qola medal úshin qaıta Norvegııa quramasymen kúsh synasyp, taǵy da utyldy. Esep – 1:5. Osylaısha, atalǵan jarys jerlesterimiz úshin sátsiz aıaqtaldy.
О́tkenge zer salsaq, dopty hokkeıden álem chempıonatynyń tusaýy 1957 jyly kesildi. Atalǵan jarystyń alǵashqy toǵyzy KSRO quramasynyń jeńisimen aıaqtaldy. 1981, 1983, 1987 jyldary Shvesııa komandasy shashasyna shań juqtyrmasa, 1985, 1989 jáne 1991 jyldary qaıta keńes odaǵynyń oıynshylary ústemdik qurdy. Odan keıin qyzyldar ımperııasy kelmeske ketti. Osy kúnge deıin 39 márte jalaýy jelbiregen jarystyń 14-i KSRO jeńisimen aıaqtalsa, shvedter men reseılikter 12 márte aldaryna jan salmady. Taǵy bir dúbirli doda Fınlıandııanyń jeńisimen aıaqtaldy.
Dúnıejúzilik dodaǵa Qazaqstan quramasy 1995 jyldan beri úzdiksiz qatysyp keledi. Sol kezden beri alty ret qola medalǵa qol jetkizdi. Alǵashqy júldeni 2003 jyly Arhangelskide alsa, 2005 jyly Qazanda, 2012 jyly Almatyda, 2013 jyly Venersborgte, 2014 jyly Irkýtskide jáne 2015 jyly Habarovskide sol nátıjeni qaıtalady. 13 ret tórtinshi orynǵa taban tirese, taǵy eki jarysta besinshi satyǵa turaqtady. О́kinishke qaraı, 2016-2019 jyldar aralyǵynda uıymdastyrylǵan sońǵy tórt chempıonattan qorjynymyz bos qaıtty. Al 2020 men 2021 jyldardaǵy jarys jer-jahandy jaılaǵan pandemııanyń saldarynan ótpeı qalsa, 2022 jylǵy doda Reseı men Ýkraınanyń arasyndaǵy jaǵdaıǵa baılanysty keıinge shegerildi.
О́zderińiz baıqap otyrǵandaı, bas júlde úshin tartys negizinen Shvesııa men Reseı arasynda ótedi. Al qola medal úshin saıysta kóbine-kóp Fınlıandııa men Qazaqstan quramalarynyń joldary qıysady. Bul básekelerde jerlesterimiz alty ret jeńiske jetse, Sýomı eli ókilderiniń 11 márte mereıi ústem boldy. Sondaı-aq bizdiń bendıshilerdi Shvesııa eki jáne Reseı bir ret qola júldeden aıyrdy.
Qazaqstan quramasy sapynda óner kórsetkender arasynda muzaıdynda jasyndaı jarqyldaǵan oıynshylar da az emes. Máselen, 2012 jyly Almatyda ótken jarystyń qorytyndysy boıynsha Andreı Reın eń úzdik qaqpashy bolyp tanyldy. 2014 jyly Irkýtskide Aleksandr Nasonov eń qundy hokkeıshige tıesili arnaıy syılyqty ıelendi. 2018 jyly Habarovskide Raýan Isalıev mergender kóshin bastady. Oraldyń dopty hokkeı mektebiniń túlegi alty ret muz aıdynyna shyǵyp, 21 ret qarsylastar qaqpasyn dál kózdedi. Sol sekildi ár jyldary álemniń shartty quramasyna engen taǵy birneshe jerlesimiz bar.
