Mysaly, elordanyń Botanıkalyq baǵynda Densaýlyq saqtaý mınıstri Ajar Ǵınııat, Mádenıet jáne sport vıse-mınıstri Sarsen Quranbek, Dúnıejúzilik densaýlyq saqtaý uıymynyń ókili jáne Qazaqstandaǵy DDU eldik ofısiniń basshysy Skender Syla qatysqan «SО́ZDEN ISKE/ WALK THE TALK/OT SLOVA K DELÝ» uranymen qysqa qashyqtyqqa júgirý aksııasy ótti.
Is-sharany ashqan QR DSM basshysy Dúnıejúzilik densaýlyq kúni adamdardyń nazaryn densaýlyqty nyǵaıtýǵa, álemdegi qaýipsizdikti qoldaýǵa jáne azamattardyń densaýlyq pen ál-aýqatty qorǵaýǵa quqyqtaryn saqtaýǵa aýdarýǵa baǵyttalǵanyn atap ótti.
Mınıstr qalyń kópshilikti densaýlyǵyn nyǵaıtýǵa, profılaktıkalyq skrınıngtik tekserýlerden, vaksınasııalaýdan ýaqtyly ótýge shaqyrdy.
«2023 jyly Dúnıejúzilik densaýlyq kúni «Barshaǵa densaýlyq» uranymen ótedi. Deni saý azamattar – kez kelgen eldiń basty damý áleýeti», dep atap ótti ol.
Dúnıejúzilik densaýlyq kúnin merekeleý sheńberinde búkil respýblıka boıynsha aýqymdy aksııalar, spartakıadalar, mektepterde ashyq densaýlyq sabaqtary, emhanalarda ashyq esik kúnderi jáne basqa da is-sharalar ótip jatyr.
DDU-nyń Qazaqstandaǵy eldik ofısiniń basshysy Skender Syla jarysqa qatysýshylardyń aldynda sóılegen sózinde Qazaqstan Úkimeti qoǵamdyq densaýlyq saqtaý salasyndaǵy ınnovasııalardy qoldaý úshin zor kúsh-jiger jumsaıtynyn atap ótti.
Dene belsendiligin nasıhattaý maqsatyndaǵy jarysqa 1 myńnan astam adam qatysty.
«Sondaı-aq Dúnıejúzilik densaýlyq kúnin merekeleý sheńberinde A. Baıtursynuly atyndaǵy Binom school-da «Densaýlyq sabaǵy» ashyq sabaǵy, Astana qalasy ákimdiginiń № 9 qalalyq emhanasynda «Ashyq esik kúni» jáne «Astana medısına ýnıversıteti» KeAQ stýdentteriniń QR DSM, DDU-nyń Qazaqstandaǵy eldik ofısiniń ókilderimen kezdesýi ótedi», delingen habarlamada.
